Tesla линейкасидаги энг арзон электрокар глобал моделга айланади. Бу ҳақда компаниянинг Хитойдаги офиси раҳбари Том Чжуга таяниб, Motor хабар берди. Бу «кичик» электрокар нафақат Хитойда, балки бутун дунё бўйлаб сотувга чиқишини билдиради. Моделнинг тахминий нархи 25 минг доллар бўлиб, у ҳозирда Tesla моделлари орасидаги энг арзон ҳисобланган Моdel 3’дан уч баробар арзонроқ.
Чжу келажакдаги моделга оид айрим тафсилотлар билан бўлишган. У тўлалигича Хитойда яратилмоқда — бунинг учун Tesla мамлакатдаги биринчи хорижий конструкторлик марказини бунёд этяпти. Ҳамёнбоп электрокар бутун дунё, жумладан, АҚШда ҳам сотувга чиқади.
Бошқа маълумотларга кўра, Америка компанияси Европа бозори учун Хитойдаги версиядан фарқ қиладиган алоҳида версияни яратмоқда. «Хитойча» Tesla’да маҳаллий ишлаб чиқарувчиларнинг эҳтиёт қисмларидан фойдаланилади: айнан шу сабаб модель нархи анча арзонлашади. Бундан ташқари, аввалроқ Tesla раҳбари Илон Маск қиммат турувчи аккумуляторларнинг оптимизация қилинишини айтганди.
Маълум қилинишича, арзон электромобилларнинг биринчи партиясини 2021 йилнинг биринчи ярмида синовдан ўтказиш бошланади, савдолар эса уч йил давомида амалга оширилади. Янги модель қандай кўринишда бўлиши ҳозирча номаълум.
Аввалроқ Tesla электрокарларини биткоин эвазига харид қилиш йўлга қўйилгани тўғрисида хабар берилганди.
Изоҳ (0)