Шавкат Мирзиёев 11 февраль куни Самарқанднинг туризм салоҳиятини, шу жумладан зиёрат туризмини ривожлантиришга доир тақдимот билан танишди, дея хабар қилмоқда Президент матбуот хизмати.
Маълум қилинишича, 2021 йил 9 февраль куни давлат раҳбарининг «Ўзбекистонда ички ва зиёрат туризмини янада ривожлантириш чора-тадбирлари тўғрисида»ги фармони қабул қилинди. Унда туризм маҳсулоти ва хизматларини диверсификация қилиш, транспорт йўналишларини кенгайтириш ҳамда сифатини ошириш, сайёҳларга мақбул шароитлар яратиш мақсадлари белгиланди.
Таъкидланишича, бу борада Самарқанднинг салоҳияти жуда юқори. Шу боис мазкур вилоятда туризм инфратузилмасини ривожлантириш бўйича комплекс ишлар олиб борилмоқда.
Хусусан, Самарқанд туманида туристик марказ ташкил этилмоқда. Бу сўлим масканда 8 та замонавий меҳмонхона, йирик анжуманлар зали, ресторанлар, боғ ва сайилгоҳлар бўлади.
Ушбу туристик марказни Самарқанд халқаро аэропорти, темир йўл вокзали, Имом Бухорий мақбараси, Регистон майдони ва бошқа диққатга сазовор жойлар билан боғлайдиган кўчалар таъмирланмоқда.
Самарқанд шаҳрининг туризм салоҳиятини ривожлантириш мақсадида 10 та янги меҳмонхона барпо этилмоқда.
Давлат раҳбари тақдимот билан танишиб, транспорт, йўл ва коммуникация тармоқларини ривожлантириш, Самарқанд шаҳрини ободонлаштириш, савдо ва хизматларни кенгайтириш бўйича топшириқлар берди.
Бундан аввал Шавкат Мирзиёев вилоят раҳбарларига 2021 йилда 1,6 миллиондан ортиқ иш ўрни яратиш бўйича топшириқ бергани, ҳафта ўртасида бирорта вазирни Тошкентда кўрса, ишдан олишини таъкидлагани ҳамда давлат активларини хусусийлаштиришни тезлаштириш бўйича топшириқ бергани ҳақида хабар берилганди.
Изоҳ (0)