Jips bo‘lib yopishib turadigan niqob taqish yoki tibbiy niqob ustidan matoli niqob taqib olish koronavirusni yuqtirib olishga qarshi himoyani oshiradi. AQSh Kasalliklar nazorati va profilaktikasi markazlari (Centers for Disease Control and Prevention, CDC) ekspertlari shunday xulosaga keldi, deb xabar beradi The New York Times.
Laboratoriya tajribalariga asoslangan CDC tadqiqotining ko‘rsatishicha, ikkitalik niqob yo‘talish paytida ajralgan zarrachalarning 92,5 foizini ushlab qolish imkoniyatini bergan. Faqat tibbiy niqobning o‘zi zarrachalarning 42 foizini, faqat matolining o‘zi esa — 44,3 foizini ushlab qolgan. Agar ham kasallangan, ham kasallanmagan odamlar jips bo‘lib turadigan tibbiy niqob taqsa yoki uni matoli niqob bilan birga taqsa, virus yuqishini 96,5 foizgacha pasaytirish mumkin.
Niqoblar foyda beradi, ular yopishib tursa va to‘g‘ri taqilsa, foyda beradi”, — dedi CDC direktori Roshel Valenski.
Ekspertlar, shuningdek, burun qismida simi bo‘lgan niqoblarni tanlashni, u yuzga jips bo‘lib turishi uchun esa quloqqa o‘tkaziladigan ilmoqni niqob chetiga tutashgan joyida bog‘lab qo‘yishni va shu tariqa tuynuklarni kichraytirishni tavsiya qiladi.
Yana bir samarali variant, ekspertlar qayd etishicha, niqob ustidan taqish uchun maxsus fiksator yoki neylon paypoqdan foydalanishdir.
Tibbiy niqoblardan foydalanish infeksiyalar, shu jumladan, COVID-19’ning oldini olish uchun Jahon sog‘liqni saqlash tashkiloti tomonidan tavsiya etiladigan chora-tadbirlar majmuasiga kiradi. Niqob taqishdan tashqari, JSST qo‘l gigiyenasi va xavfsiz masofaga qat’iy amal qilishni eslatadi.
Izoh (0)