Жипс бўлиб ёпишиб турадиган ниқоб тақиш ёки тиббий ниқоб устидан матоли ниқоб тақиб олиш коронавирусни юқтириб олишга қарши ҳимояни оширади. АҚШ Касалликлар назорати ва профилактикаси марказлари (Centers for Disease Control and Prevention, CDC) экспертлари шундай хулосага келди, деб хабар беради The New York Times.
Лаборатория тажрибаларига асосланган CDC тадқиқотининг кўрсатишича, иккиталик ниқоб йўталиш пайтида ажралган заррачаларнинг 92,5 фоизини ушлаб қолиш имкониятини берган. Фақат тиббий ниқобнинг ўзи заррачаларнинг 42 фоизини, фақат матолининг ўзи эса — 44,3 фоизини ушлаб қолган. Агар ҳам касалланган, ҳам касалланмаган одамлар жипс бўлиб турадиган тиббий ниқоб тақса ёки уни матоли ниқоб билан бирга тақса, вирус юқишини 96,5 фоизгача пасайтириш мумкин.
Ниқоблар фойда беради, улар ёпишиб турса ва тўғри тақилса, фойда беради», — деди CDC директори Рошель Валенски.
Экспертлар, шунингдек, бурун қисмида сими бўлган ниқобларни танлашни, у юзга жипс бўлиб туриши учун эса қулоққа ўтказиладиган илмоқни ниқоб четига туташган жойида боғлаб қўйишни ва шу тариқа туйнукларни кичрайтиришни тавсия қилади.
Яна бир самарали вариант, экспертлар қайд этишича, ниқоб устидан тақиш учун махсус фиксатор ёки нейлон пайпоқдан фойдаланишдир.
Тиббий ниқоблардан фойдаланиш инфекциялар, шу жумладан, COVID-19’нинг олдини олиш учун Жаҳон соғлиқни сақлаш ташкилоти томонидан тавсия этиладиган чора-тадбирлар мажмуасига киради. Ниқоб тақишдан ташқари, ЖССТ қўл гигиенаси ва хавфсиз масофага қатъий амал қилишни эслатади.
Изоҳ (0)