Bosniyalikdan daniyalikkacha. “Barselona” tarixidagi to‘qqizinchi raqamlar

Ortda qolgan 2020-yilda, Lionel Messining “Barselona”dan ketmoqchi bo‘lgan chog‘da ispan OAVlarida daniyalik hujumchi Martin Breytueytning 10-raqamni olmoqchi ekani haqidagi xabarlar paydo bo‘ldi. Dunyo bo‘ylab “Barselona” muxlislari bu yangiliklardan hayratga tushdi va qaysidir ma’noda g‘azablandi ham. Ammo keyinchalik bu shunchaki hazil ekanligi ma’lum bo‘ldi.

Biroq har bir hazilda qanchadir miqdorda haqiqat bo‘ladi deyilganidek, Luis Suares jamoani tark etganidan keyin daniyalik hujumchi afsonaviy 9-raqamni olishdan uyalib o‘tirmadi. Shunday ekan, Messi ketgan taqdirda uning uning 10-raqamni olmasligiga hech qanday kafolat yo‘q edi.

Barca blogi shu munosabat bilan katalonlar safida 9-raqam ostida to‘p surgan barcha futbolchilarni eslashga qaror qildi. Avvallari o‘yinchilarga butun mavsum uchun ma’lum raqam berilmasdi. Raqamni har bir uchrashuv oldidan tanlash mumkin bo‘lgan. Faqat 1995-yilga kelibgina (zamonaviy) qoidalar joriy etildi. Afsonaviy ro‘yxat bilan tanishtirish aynan shu vaqtdan boshlanadi:

Meho Kodro (Bosniya)

1994/95-yilgi mavsumda “Real Sosyedad”da o‘ynagan bosniyalik hujumchi 25 ta goli bilan La Liga to‘purarlari ro‘yxatida ikkinchi o‘rinni egallaydi. O‘sha mavsum tugashidan bir oy oldin 28 yoshli Kodroga Yoxan Kroyffning shaxsan o‘zi qo‘ng‘iroq qilib, uni “ko‘k-anorranglilar”ning yangi loyihasining bir qismi bo‘lishni taklif qiladi. Ma’lumotlarga qaraganda, suhbat atigi ikki daqiqa davom etgan.

“Barselona”da Kodro faqatgina bir mavsum o‘tkazadi va 43 o‘yinda 15 ta gol urib, jamoaning eng yaxshi to‘purariga aylanadi. O‘sha yili “Barsa” Ispaniya chempionatida 3-o‘rinni egallaydi. Natijada, Kroyff ishdan bo‘shatiladi. Jamoaga esa boshqa bir yulduz Ronaldo olib kelinadi. Bosniyalik esa zaxira o‘rindig‘ida qolishni istamaydi va jamoani tark etishga qaror qiladi.

Ronaldo (Braziliya)

O‘tgan asrning 90-yillari ikkinchi yarmida “Fenomen” laqabli braziliyalik sayyoradagi eng samarali forvard hisoblanardi. U “Barselona” safida bir mavsumda 49 o‘yinda 47 ta gol urdi. Aynan “so‘yloq”ning yagona goli 1997-yilgi Kubok egalari Kubogi finalida “Barselona”ga PSJ ustidan g‘alaba keltiradi.

Sonni Anderson (Braziliya)

Braziliyalik Ronaldodan keyin “Barselona”ning asosiy markaziy hujumchisi “Monako”dan sotib olingan vatandoshi bo‘ladi. Sonni katalonlar safida ikki mavsumda 68 uchrashuvda 21 ta gol urgan.

Patrik Klyuyvert (Niderlandiya)

Niderlandiyalik futbolchi asr boshlarida “Barsa”ning asosiy to‘purarlaridan biri bo‘ldi. Klyuyvert o‘sha mashhur Rivaldo bilan birgalikda ko‘p yillar davomida butun Yevropani dahshatga solib kelgan. 1998–2004-yillarda Patrik 257 o‘yinda 122 ta gol uradi. O‘sha davr hujumchisi uchun bu juda yaxshi natija hisoblanardi. Patrik “Barsa”dagi birinchi mavsumini 19-raqamda o‘tkazadi, Sonni Anderson ketganidan keyin esa to‘qqizni oladi.

Samyuel Eto’O (Kamerun)

2000-yillarning o‘rtalarida “Barselona”da yana bir afsonaviy hujumchilar tandemi shakllanadi. Rivaldo va Klyuyvert o‘rnini Eto’O va Ronaldinyo egallaydi. Kamerunlik katalonlar safidagi olti mavsumida ikki bor Chempionlar Ligasini yutishga yordam berdi va har ikkala final o‘yinida ham raqib darvozasini ishg‘ol etdi. Umuman hisobda Eto’O “Barselona” safida 199 uchrashuvda 130 ta gol urgan.

Zlatan Ibrahimovich (Shvetsiya)

2010-yilda “Inter” va “Barsa” o‘rtasida markaziy hujumchilar almashinuvi ro‘y beradi. EtoO Joze Mourinyoning “Inter”iga o‘tgan bo‘lsa, Zlatan “Kamp Nou”ga keladi. Asosiy hujumchi pozitsiyasi bilan bir qatorda Ibra kamerunlikdan afsonaviy to‘qqizinchi raqamni ham meros qilib oladi. Shvetsiyalik “Barsa”da bir mavsum o‘tkazib, 46 uchrashuvda 22-marta gol urishga muvaffaq bo‘ladi.

Boyan Krkich (Ispaniya)

Ibra jamoadan ketgach, 9-raqam avval 27 va 11-raqamlar ostida o‘ynagan “Barselona” tarbiyalanuvchisiga o‘tadi. Vinger sifatida harakat qilgan Boyan “Barsa” tarkibida 163 uchrashuv o‘tkazib, 41 ta gol urgan.

Aleksis Sanches (Chili)

Krkich sotib yuborilgach, uning o‘rniga afsonaviy raqamni “Udineze”dan xarid qilingan Aleksis Sanches qo‘lga kiritdi. “Barsa”da chililik futbolchi 141 o‘yin o‘tkazib, 46 ta gol uradi.

Luis Suares (Urugvay)

Kataloniya poytaxtidagi oltita mavsumda (to‘liq bo‘lmagan) Suares klub tarixidagi eng sermahsul o‘yinchilar uchligiga kirishga muvaffaq bo‘ldi. Messi, Neymar va o‘zidan iborat bo‘lgan trioning bir qismiga aylangan urugvaylik 285 uchrashuvda 195 ta gol urgan. Suaresning 2015-yilgi Chempionlar Ligasi finalidagi g‘alaba to‘pi va ko‘plab qaychi uslubidagi durdonalari “Barselona” muxlislari xotirasida abadiy saqlanib qolinishiga hech qanday shubha yo‘q. Afsuski, klub u bilan munosib tarzda xayrlashmadi.

Martin Breytueyt (Daniya)

Daniyalik hujumchi har qancha tanqid qilinishiga qaramay, nafaqat “Barselona” tarixiga kirdi, balki Chempionlar Ligasidan o‘rin olgan “Dinamo Kiyev”ga qarshi o‘yinda dubl qayd etdi. Bu esa unga Suaresning 5 yil ichida Chempionlar Ligasi mehmon o‘yinlaridagi urgan gollaridan yaxshiroq natija qayd etishi uchun yetarli bo‘ldi.

Breytueyt kataloniyaliklar tarkibidagi ilk mavsumida 19-raqamda to‘p surdi. Xuddi shunday holat yuqorida ta’kidlangan Patrik Klyuyvertda ham kuzatilgan. Shunday ekan, kim bilsin, balki Martinga ham mashhur niderlandiyalikning muvaffaqiyatini takrorlash nasib etar.