Боснияликдан данияликкача. «Барселона» тарихидаги тўққизинчи рақамлар

Ортда қолган 2020 йилда, Лионель Мессининг «Барселона»дан кетмоқчи бўлган чоғда испан ОАВларида даниялик ҳужумчи Мартин Брэйтуэйтнинг 10-рақамни олмоқчи экани ҳақидаги хабарлар пайдо бўлди. Дунё бўйлаб «Барселона» мухлислари бу янгиликлардан ҳайратга тушди ва қайсидир маънода ғазабланди ҳам. Аммо кейинчалик бу шунчаки ҳазил эканлиги маълум бўлди.

Бироқ ҳар бир ҳазилда қанчадир миқдорда ҳақиқат бўлади дейилганидек, Луис Суарес жамоани тарк этганидан кейин даниялик ҳужумчи афсонавий 9-рақамни олишдан уялиб ўтирмади. Шундай экан, Месси кетган тақдирда унинг унинг 10-рақамни олмаслигига ҳеч қандай кафолат йўқ эди.

Барcа блоги шу муносабат билан каталонлар сафида 9-рақам остида тўп сурган барча футболчиларни эслашга қарор қилди. Авваллари ўйинчиларга бутун мавсум учун маълум рақам берилмасди. Рақамни ҳар бир учрашув олдидан танлаш мумкин бўлган. Фақат 1995 йилга келибгина (замонавий) қоидалар жорий этилди. Афсонавий рўйхат билан таништириш айнан шу вақтдан бошланади:

Меҳо Кодро (Босния)

1994/95 йилги мавсумда «Реал Сосьедад»да ўйнаган босниялик ҳужумчи 25 та голи билан Ла Лига тўпурарлари рўйхатида иккинчи ўринни эгаллайди. Ўша мавсум тугашидан бир ой олдин 28 ёшли Кодрога Йохан Кройффнинг шахсан ўзи қўнғироқ қилиб, уни «кўк-анорранглилар»нинг янги лойиҳасининг бир қисми бўлишни таклиф қилади. Маълумотларга қараганда, суҳбат атиги икки дақиқа давом этган.

«Барселона»да Кодро фақатгина бир мавсум ўтказади ва 43 ўйинда 15 та гол уриб, жамоанинг энг яхши тўпурарига айланади. Ўша йили «Барса» Испания чемпионатида 3-ўринни эгаллайди. Натижада, Кройфф ишдан бўшатилади. Жамоага эса бошқа бир юлдуз Роналдо олиб келинади. Босниялик эса захира ўриндиғида қолишни истамайди ва жамоани тарк этишга қарор қилади.

Роналдо (Бразилия)

Ўтган асрнинг 90 йиллари иккинчи ярмида «Феномен» лақабли бразилиялик сайёрадаги энг самарали форвард ҳисобланарди. У «Барселона» сафида бир мавсумда 49 ўйинда 47 та гол урди. Айнан «сўйлоқ»нинг ягона голи 1997 йилги Кубок эгалари Кубоги финалида «Барселона»га ПСЖ устидан ғалаба келтиради.

Сонни Андерсон (Бразилия)

Бразилиялик Роналдодан кейин «Барселона»нинг асосий марказий ҳужумчиси «Монако»дан сотиб олинган ватандоши бўлади. Сонни каталонлар сафида икки мавсумда 68 учрашувда 21 та гол урган.

Патрик Клюйверт (Нидерландия)

Нидерландиялик футболчи аср бошларида «Барса»нинг асосий тўпурарларидан бири бўлди. Клюйверт ўша машҳур Ривалдо билан биргаликда кўп йиллар давомида бутун Европани даҳшатга солиб келган. 1998–2004 йилларда Патрик 257 ўйинда 122 та гол уради. Ўша давр ҳужумчиси учун бу жуда яхши натижа ҳисобланарди. Патрик «Барса»даги биринчи мавсумини 19-рақамда ўтказади, Сонни Андерсон кетганидан кейин эса тўққизни олади.

Самюуэль Это’O (Камерун)

2000 йилларнинг ўрталарида «Барселона»да яна бир афсонавий ҳужумчилар тандеми шаклланади. Ривалдо ва Клюйверт ўрнини Это’O ва Роналдиньо эгаллайди. Камерунлик каталонлар сафидаги олти мавсумида икки бор Чемпионлар Лигасини ютишга ёрдам берди ва ҳар иккала финал ўйинида ҳам рақиб дарвозасини ишғол этди. Умуман ҳисобда Это’O «Барселона» сафида 199 учрашувда 130 та гол урган.

Златан Ибраҳимович (Швеция)

2010 йилда «Интер» ва «Барса» ўртасида марказий ҳужумчилар алмашинуви рўй беради. Это’О Жозе Моуриньонинг «Интер»ига ўтган бўлса, Златан «Камп Ноу»га келади. Асосий ҳужумчи позицияси билан бир қаторда Ибра камерунликдан афсонавий тўққизинчи рақамни ҳам мерос қилиб олади. Швециялик «Барса»да бир мавсум ўтказиб, 46 учрашувда 22 марта гол уришга муваффақ бўлади.

Боян Кркич (Испания)

Ибра жамоадан кетгач, 9-рақам аввал 27 ва 11-рақамлар остида ўйнаган «Барселона» тарбияланувчисига ўтади. Вингер сифатида ҳаракат қилган Боян «Барса» таркибида 163 учрашув ўтказиб, 41 та гол урган.

Алексис Санчес (Чили)

Кркич сотиб юборилгач, унинг ўрнига афсонавий рақамни «Удинезе»дан харид қилинган Алексис Санчес қўлга киритди. «Барса»да чилилик футболчи 141 ўйин ўтказиб, 46 та гол уради.

Луис Суарес (Уругвай)

Каталония пойтахтидаги олтита мавсумда (тўлиқ бўлмаган) Суарес клуб тарихидаги энг сермаҳсул ўйинчилар учлигига киришга муваффақ бўлди. Месси, Неймар ва ўзидан иборат бўлган трионинг бир қисмига айланган уругвайлик 285 учрашувда 195 та гол урган. Суареснинг 2015 йилги Чемпионлар Лигаси финалидаги ғалаба тўпи ва кўплаб қайчи услубидаги дурдоналари «Барселона» мухлислари хотирасида абадий сақланиб қолинишига ҳеч қандай шубҳа йўқ. Афсуски, клуб у билан муносиб тарзда хайрлашмади.

Мартин Брэйтуэйт (Дания)

Даниялик ҳужумчи ҳар қанча танқид қилинишига қарамай, нафақат «Барселона» тарихига кирди, балки Чемпионлар Лигасидан ўрин олган «Динамо Киев»га қарши ўйинда дубль қайд этди. Бу эса унга Суареснинг 5 йил ичида Чемпионлар Лигаси меҳмон ўйинларидаги урган голларидан яхшироқ натижа қайд этиши учун етарли бўлди.

Брэйтуэйт каталонияликлар таркибидаги илк мавсумида 19-рақамда тўп сурди. Худди шундай ҳолат юқорида таъкидланган Патрик Клюйвертда ҳам кузатилган. Шундай экан, ким билсин, балки Мартинга ҳам машҳур нидерландияликнинг муваффақиятини такрорлаш насиб этар.