Андижонда сўнгги уч йилда ҳокимлар томонидан чиқарилган қарорларнинг 243 таси судда бекор қилингани маълум бўлди

Андижонда фаолият юритаётган маъмурий судлар 2018—2020 йилларда ҳокимлар томонидан чиқарилган қарорларнинг 243 тасини бекор қилган. Бу ҳақда вилоят маъмурий суди раиси Отабек Мирзамаҳмудов маълум қилди, дея хабар берди «Дарё» мухбири.

Таъкидланишича, Андижон вилоят судида ОАВ вакиллари учун «Суд муҳокамаси ошкоралиги ва судлар фаолиятига доир ахборотлар олиш ҳуқуқини таъминлаш» мавзусида матбуот анжумани ўтказилган. Унда суд муҳокамаси ошкоралигини таъминлаш борасида олиб борилаётган ишлари хусусида сўз борган.

Вилоят маъмурий суди раиси Отабек Мирзамаҳмудовнинг айтишича, сўнгги уч йил давомида ҳокимлар қарорини ҳақиқий эмас деб топиш билан боғлиқ 606 та иш кўриб чиқилган. Шундан 243 та иш ҳоким қарори ҳақиқий эмас топиш билан якунланган.

«Сўнгги йилларда ҳокимлар томонидан қабул қилинаётган қарорларнинг судлар томонидан бекор қилинаётгани бундан буён уларнинг қарор қабул қилишида очиқликни таъминлаш зарурлигини тақозо этмоқда. Шунинг учун маҳаллий давлат ҳокимияти идораларининг қарорларини ҳисобга қўйиш ва эълон қилиш бўйича электрон ахборот тизими жорий этилиши фуқароларнинг бузилган ҳуқуқлари ҳимояланиши ҳисобланади. Жумладан, Андижон вилоят маъмурий судлари томонидан ҳам 2020 йил давомида ҳокимларнинг 216 та қарорини ҳақиқий эмас деб топиш билан боғлиқ оммавий ҳуқуқий муносабатлардан келиб чиқадиган ишлар кўриб чиқилган бўлиб, шундан 99 таси қаноатлантирилган. Шунингдек, 95 таси рад этилган, 10 таси иш юритишдан тугатилган, 12 таси эса кўрмасдан қолдирилган. Сўнгги уч йиллик статистика маълумотини кўрадиган бўлсак, 2018—2020 йиллар давомида ҳокимлар томонидан қабул қилинган 243 та қарор ҳақиқий эмас, деб топилган. Бу эса фуқароларнинг бузилган ҳуқуқлари суд томонидан самарали тарзда ҳимояланиб келаётганидан далолат беради», — деди вилоят маъмурий суди раиси Отабек Мирзамаҳмудов.