Amerikaning Coalition for a Safer Web (Xavfsiz internet koalitsiyasi) notijorat tashkiloti prezidenti Mark Ginsberg Google tegishli bo‘lgan Alphabet kompaniyasini sudga berdi, deb yozadi Meduza.
Foto: imageBROKER
U Kaliforniya sudi kompaniyaga Google Play dasturlar do‘konidan Telegram messenjerini o‘chirib tashlash majburiyatini yuklashini talab qilmoqda.
Ginsberg iddao qilishicha, Telegram ekstremizm va antisemitizmni tarqatishga imkoniyat yaratadi, shuningdek, irqiy asosda tahdidlar yuborish va zo‘ravonlikni muvofiqlashtirish uchun foydalaniladi. Da’voda ta’kidlanishicha, Kapitoliyga shiddatli hujumdan keyin Google o‘zining dasturlar do‘konidan Tramp tarafdorlari orasida mashhur bo‘lgan Parler ijtimoiy tarmog‘ini o‘chirib tashlagan, ammo Telegram’ga nisbatan bunday chorani qo‘llamagan.
Avvalroq Ginsberg Apple korporatsiyasini ham Telegram’ni App Store’dan o‘chirish talabi bilan sudga bergan edi.
Telegram asoschisi Pavel Durov sud da’vosini to‘g‘ridan to‘g‘ri izohlamadi, ammo bir hafta ichida messenjer administratorlari AQShda zo‘ravonlikka qaratilgan yuzlab da’vatlarni bloklab qo‘yganini ma’lum qildi.
