Telegram asoschisi Pavel Durov 18-yanvar kuni o‘z kanalida o‘tgan bir hafta ichida messenjer administratorlari AQShda zo‘ravonlikka qaratilgan yuzlab da’vatlarni bloklab qo‘yganini ma’lum qildi, deb yozadi Meduza.

Foto: “Sev.tv”

Durovning ta’kidlashicha, Telegram “tinch munozaralar va noroziliklarni ma’qullaydi”, ammo zo‘ravonlikka da’vatlarga doim qarshi bo‘lib kelgan — bu platform qoidalari bilan taqiqlangan. Uning qo‘shimcha qilishicha, Telegram jamoasi “foydalanuvchilardan kelgan xabarlarni ko‘rib chiqishda davom etmoqda, shuningdek, to‘g‘ridan to‘g‘ri zo‘ravonlikka undovchi kontentni faol ravishda o‘chirmoqda”.

Telegram asoschisi qonunga zid kontent haqida xabar bergan foydalanuvchilarga minnatdorlik bildirdi.

Eslatib o‘tamiz, Amerikaning Coalition for a Safer Web (Xavfsiz internet koalitsiyasi) notijorat tashkiloti Apple korporatsiyasini sudga berib, App Store dasturlar do‘konidan Telegram ilovasini o‘chirib tashlashni talab qildi. Da’vogarlar ta’kidlashicha, Telegram’da antisemitizm, irqchilik va neonatsizm mazmunidagi kontent tarqalmoqda, bu App Store’ning dasturlar uchun qoidalariga ziddir. Pavel Durov bu da’voni to‘g‘ridan to‘g‘ri izohlamadi.

Amaldagi AQSh prezidenti Donald Trampning tarafdorlari Kapitoliyga hujum uyushtirganidan keyin Apple va Google o‘z dasturlar do‘konlaridan Tramp tarafdorlari orasida ommabop bo‘lgan Parler ijtimoiy tarmog‘ini o‘chirib tashladi. Ijtimoiy tarmoqqa xosting xizmatlarini taqdim etuvchi Amazon u o‘z serverlaridan uzilganini e’lon qildi. Shundan keyin Parler foydalanuvchilari boshqa ijtimoiy tarmoqlarga, shu jumladan, Telegram’ga ham o‘ta boshladi.