Ижтимоий тармоқларда бошпанасиз ҳайвонлар яшаши учун «Гавчег» номли макон яратган Сергей Руснакнинг калтаклангани тўғрисида хабарлар тарқалди. «Меҳр ва оқибат» ҳайвонларни ҳимоя қилиш жамияти вакиллари содир бўлган воқеага ойдинлик киритган.
«Мен бошпанасиз ҳайвонларни тутиб кетадиганларни чақирган ва итларни отиб ташланишига рози бўлган аёл билан келишиб олишни хоҳладим. Унга озиқ-овқат маҳсулотлари борасида тез-тез ёрдам бериб турардим, унинг уйидаги ҳайвонларни даволаганман, овқатлантирганман. Муаммо бўлмайди деб ўйладим. Бироқ унинг мен олдин ҳеч кўрмаган жияни чиқди. Бошимга урди ва мен ҳушимни йўқотдим. Кейин эса калтаклади — бу ҳақда менга қўшниларим айтди», — дейди Сергей Руснак.
Аниқланишича, ўша куни бошпанасиз ҳайвонларни тутиш билан шуғулланувчи хизмат ходимлари чақирув бўйича манзилга келган ва аёлга итларни орқасидан қувиб юрмасликларини, уларни отиб ўлдиришларини билдирган, бироқ бунинг учун участка нозирининг рухсати керак бўлган.
Мазкур хизмат ходимлари чақирилганидан хабар топган Сергей қўшни аёл билан келишишга уринган. Гувоҳларнинг сўзларига кўра, у уйга яқинлашганида аёлнинг Ўртасарой посёлкасидаги 44-сонли мактабнинг 11-синфда ўқийдиган жияни эркакнинг бошига ғишт билан урган ва ҳушсиз ётганида калтаклай бошлаган.
Орадан бироз вақт ўтгач, ҳодиса жойига Сергейнинг собиқ турмуш ўртоғи Оксана Руснак етиб келган ва эркакни шифохонага олиб борган. У ерда жабрланувчига тос суяги синиши ва мия чайқалиши ташхиси қўйилган.
«Шифохонага милиция ходимлари келиб, ариза олди, қўнғироқ қилди — саволлар берди. Афтидан, ҳозирда анави йигитчани қидиришмоқда. Ўша воқеадан сўнг, у на уйида ва на мактабда кўриниш берган», — дейди жабрланувчи.
Изоҳ (0)