Жаҳон соғлиқни сақлаш ташкилоти (ЖССТ) вакцинация бўлими раҳбари Кейт O’Брайеннинг таъкидлашича, коронавирусга қарши вакцинация бепуштликка олиб келиши мумкин эмас, бу шунчаки миш-миш, дея хабар берди «РБК».
Унинг сўзларига кўра, турли вакциналар атрофида мазкур миш-мишлар тарқалмоқда, аммо улар ҳақиқатдан йироқ. «Бепуштликни келтириб чиқарадиган бирорта вакцина йўқ», — деди O’Брайен.
2020 йил июнь ойида Россия Соғлиқни сақлаш вазирлигининг болалар ва ўсмирлар учун бош мутахассис-гинекологи Елена Уварова COVID-19 билан касалланган эркакларда бепуштлик истисно қилинмаслигини айтган. «Ҳозирда ушбу бошдан ўтказилган COVID-19 инфекцияси сперма сифатини 38 фоизга пасайтираётгани кузатилмоқда», — деган у.
Кейинчалик, Россия соғлиқни сақлаш вазири Михаил Мурашко, коронавирус инфекцияси бепуштликка олиб келиши мумкинлиги ҳақида аниқ айтиб бўлмаслигини таъкидлаган. Унинг сўзларига кўра, «коронавирус инфекцияси пайтида патогенлар аниқланиб, яллиғланиш касалликлари пайдо бўлиши ҳақида айрим фикрлар чоп этилди», аммо бу ҳақда ҳали ишончли маълумотлар йўқ.
Аввалроқ COVID-19’ни сўлак орқали аниқлайдиган биринчи тестни ишлаб чиқишга раҳбарлик қилган ва пандемияга қарши курашда муҳим рол ўйнаган тадқиқотчи Эндрю Брук кутилмаганда вафот этгани ҳақида хабар берилганди. 51 ёшли олимнинг ўлимига юрак хуружи сабаб бўлган.
Британиялик йигит Нетен Каммингс эса 2020 йилда саратон, менингит, сепсис ва коронавирусни енгишга муваффақ бўлган. У 2020 йилни «жаҳаннам йили» деб атаган.
Изоҳ (0)