Президент Гурбангули Бердимуҳамедов кетма-кет уч кун Туркманистон ҳукумати аъзолари билан уларнинг 2020 йилдаги фаолияти натижаларига бағишланган мажлис ўтказди. Бу ҳақда «Хроника Туркменистана» хабар қилди.
Таъкидланишича, 4 февраль куни бўлиб ўтган йиғилиш қурилиш-саноат комплексини ривожлантиришга бағишланди.
Қурилиш ва саноат учун масъул вазирлар ва раҳбарларга сўз беришдан олдин Бердимуҳамедов ушбу соҳа миллий иқтисодиёт учун муҳим соҳалардан бири эканлигини таъкидлади. Унинг айтишича, катта миқдордаги давлат маблағлари киритилишига қарамай, ушбу соҳада камчиликлар ва фойдаланилмаган захиралар мавжуд.
Давлат раҳбари биринчи бўлиб Қурилиш ва архитектура вазири Раҳим Гандимовнинг ишини танқид қилди, унга илғор технологияларни қурилишга янада кенгроқ жорий этиш, шунингдек, минтақанинг сейсмик фаоллигини ҳисобга олган ҳолда меъморий лойиҳаларни ишлаб чиқишга илмий ёндашиш топширилди.
Навбатдаги ҳисоботни Президентнинг ўғли, саноат ва қурилиш ишлаб чиқариш вазири Сардар Бердимуҳамедов тақдим этди. У маҳаллий қурилиш материаллари ишлаб чиқариш режаси бажарилганини эълон қилди.
Кичик Бердимуҳамедов «Туркман алабайи» Халқаро ассоциацияси учун итларга бошпана қуриш ҳақида гапириб, ушбу ишларни Мустақиллик кунига (27 сентябрь) қадар якунлаш учун барча имкониятларни ишга солаётганини айтди.
Сардар Бердимуҳамедовнинг иши бўйича давлат раҳбарининг ҳеч қандай шикояти бўлмаган, аммо унга корхоналарни тўлиқ қувватда ишлатиш, қурилиш объектларини импорт ўрнини босувчи саноат ва қурилиш моллари билан таъминлашни яхшилаш, янги электрон маҳсулотлар ишлаб чиқаришни давом эттириш бўйича кўрсатма берилди.
Энергетика вазири Чаримират Пурчеков аҳоли ва саноат объектларини электр энергияси билан узлуксиз таъминлаш ва экспорт йўналишларини кенгайтириш бўйича ишлар тўғрисида ҳисобот берди.
Ҳисобот натижасида вазирга газ турбинаси заводлари, электр станциялари ва линияларида таъмирлаш ишларини олиб бориш, шунингдек, уларни захира ва сарф материаллари билан таъминлаш бўйича топшириқлар берилди. «Импорт қилинган хом ашё тўғридан-тўғри ишлаб чиқарувчилардан қулай нархда сотиб олиниши керак», – деди Бердимуҳамедов.
Президент таъкидлашича, умумий ишлаб чиқариш қувватининг атиги 44,8 фоизи энергетика соҳасига тўғри келади ва мамлакатдаги электр станцияларида ўрнатилган 36 та газ турбинасидан фақат иккитаси капитал таъмирланган ва яна иккитасида таъмирлаш ишлари давом этмоқда. Тўққизта объектда газ турбинаси ускуналарини капитал таъмирлаш керак.
29 декабрь куни Ашхободга ва Туркманистоннинг Ахал, Лебап ҳамда Тошҳовуз вилоятларидаги бир қатор аҳоли пунктларига электр энергияси етказиб бериш Маридаги буғ ва газ электр станциясида содир бўлган портлаш туфайли тўхтатилган. Бахтсиз ҳодиса сифатсиз техник хизмат туфайли содир бўлган.
Туркманхимия давлат концерни раҳбари Ниязли Ниязлев ҳар хил турдаги кимёвий маҳсулотлар ишлаб чиқариш режалари ва кимё корхоналарини таъмирлаш ва модернизация қилиш бўйича ишлар тўғрисида сўзлаб берди.
Шунга қарамай, Бердимуҳамедов Ниёзлевнинг ишидан норози бўлди. Давлат раҳбарининг таъкидлашича, Теженкарбамид заводи қуввати атиги 53,7 фоизга, Марикарбамид заводи 62,5 фоизга, Мариазот ишлаб чиқариш бирлашмаси эса атиги 23 фоизга фойдаланиши таъкидланди. Натижада Ниязлевга қаттиқ танбеҳ берилди.
Ашхобод ҳокими Язтаган Гилижов 2020 йилда пойтахт ободонлаштирилиши ҳақида гапирди.
«Халқимиз раҳбарининг фаолияти туфайли оқ мармар пойтахт – Ашхободнинг ташқи қиёфаси таниб бўлмайдиган даражада ўзгариб кетди, ҳаёт даражаси юқорилиги эса халқаро стандартларга жавоб беради», – деди Гилижов. Маълум қилинишича, 2020 йили шаҳарда 22 та турли хил объектлар очилиб, 1984 та оила учун уй-жой қурилган.
Президент бу йил ҳокимларга Туркманистон мустақиллигининг 30 йиллигига қадар очилиши режалаштирилган янги бинолар қурилишини назорат қилишни буюрди.
Туркманистон давлат архитектура ва қурилиш институти ректори Байраммйрат Атаманов малакали мутахассислар тайёрлаш тўғрисида гапирди, уларнинг ёрдамида Ахал вилоятининг янги маркази учун бинолар ва алабай итларини кўпайтириш учун махсус бинолар лойиҳалари ишлаб чиқилгани ва амалга оширилганини маълум қилди. Бердимуҳамедов Атамановга университетда ўқув ва тарбиявий ишларни такомиллаштиришни, ёшларни ҳам ўқитишнинг, ҳам ватанпарварлик тарбиясининг замонавий усулларини жорий этишни буюрди.
Бундан ташқари, Атамановга Туркманистонда йўл қурилишида фойдаланиш учун материаллар ишлаб чиқариш имкониятларини ўрганиш топширилди.
Учрашув якунида Президент қурилиш ва саноат мажмуаси учун масъул бўлган бош вазир ўринбосари Шамуҳаммет Дурдилевга, вазирлар ва ихтисослашган корхоналар раҳбарларига бир қатор кўрсатмалар берди.
Аввалроқ Бердимуҳамедов олимларга картошка ҳосилдорлигини оширишни буюргани, Россиянинг Туркманистондаги элчихонаси электрон почтаси чет элга чиқувчи фуқароларнинг аризаси кўплигидан юкламани кўтаролмагани ҳамда Бердимуҳамедов гўзаллик танловида ғолиб бўлган итлар учун бериладиган медал дизайнини маъқуллагани ҳақида хабар берилганди.
Изоҳ (0)