Бельгия ҳукумати COVID-19 билан боғлиқ эпидемиологик вазият барқарорлашиши муносабати билан карантин чораларини юмшатади. Бу ҳақда мамлакат бош вазир Александр Де Кро эълон қилди, деб ёзмоқда «Интерфакс».
Мамлакатда 8 февралдан дам олиш масканлари ва лагерлар, 13 февралдан ҳайвонот боғлари ва сартарошхоналар очилади.
«Сартарошхоналарнинг эпидемиологик қоидаларга қатъий риоя қилган ҳолда фаолият юритишига рухсат берилди», — деди бош вазир. Тиббий бўлмаган хизматлар, масалан, гўзаллик салонлари, массаж, татуировка, пирсинг хоналари ва шу каби бевосита ижтимоий алоқаларни ўз ичига олган бошқа хизматлар 1 мартдан ўз ишини давом эттириши мумкин.
Ходимлар қатъий санитария чораларига риоя қилиши ва мунтазам равишда COVID-19’га тест топшириб туриши керак. Бундай хизматларни уйда кўрсатиш тақиқланади.
13 февралдан бошлаб кўчмас мулк агентлари сотувдаги уйларни кўриш истагида бўлган мижозларга ҳамроҳлик қилиши мумкин.
Де Кронинг айтишича, декабрь ойининг бошидан бери инфекция билан боғлиқ вазият барқарорлашиб, касалхонага ётқизилаётган беморлар ва касалликдан ўлимлар сони камаймоқда. Мамлакатдаги барқарорликка коронавируснинг янги, юқумлироқ бўлган штаммларининг тарқалиши бошлангач эришилди. Бошқа мамлакатларда уларнинг тарқалиши сезиларли даражада салбий таъсир кўрсатди. Бош вазир Бельгияда ўзини оқлаган чеклов чоралари ва фуқароларнинг интизоми туфайли ушбу барқарорликка эришилган деб ҳисобламоқда.
Аввалроқ Москва мери коронавирусдан тузалганлар учун чекловларни юмшатишга ваъда берганди. Унинг сўзларига кўра, агар бирор киши аллақачон касалликдан тузалган бўлса, унда «нега у уйда ўтириши керак?».
Туркия эса 2021 йилнинг апрель ойидан сайёҳлар учун туризм мавсумини бошлайди. Мавсум аввал Ўрта Ер денгизи, кейинроқ Эгей денгизи соҳилларида йўлга қўйилади.
Изоҳ (0)