Ўзбекистон транспорт прокуратураси 2020 йилда йўл қурилиши соҳасида 11,5 млрд сўм талон-торож қилинганини маълум қилди

Республика транспорт прокуратураси томонидан 2020 йилда йўл ва кўприк қурилиш соҳасида бюджетдан ажратилган пулларни ўзлаштириш ҳолати бўйича 40 га яқин жиноят иши очилган. Уларда йўллар қурилишидаги коррупцион ҳолатлар бўйича 11,5 миллиард сўмлик давлат мулки талон-торож этилгани фош этилди. Бу ҳақда 3 февраль куни АОКАда ўтказилган матбуот анжуманида маълум қилинди, дея хабар берди Бош прокуратура матбуот хизмати.

Қайд этилишича, 2020 йил давомида Транспорт прокуратураси томонидан ҳар бир объектга чиқиб, йўллар аҳволи ўрганилганда қатор камчиликлар борлиги аниқланган.

«Аввало йўл ва кўприк қурилишига оид қонунчилик ҳамда уларни қуришда қўлланиладиган давлат стандартлари, йўриқнома ва қоидаларни такомиллаштириб, ҳозирги замонга мослаштириш зарурати юзага келган. Боиси ҳозирги кундаги қурилишлар ҳанузгача Собиқ иттифоқ давридаги стандартлар асосида амалга оширилмоқда.

Мисол учун, ўша пайтларда йўллар 14 тонналик юк машиналарига мослаштирилган бўлса, бугунги кунда 80 тонналик автомобиллар йўлларда юрибди. Бу ҳам йўллар сифати тез бузилиши, ишдан чиқишига олиб келмоқда. Транспорт прокуратураси томонидан бу борада тегишли таклифлар берилганлиги қайд этилди», – дейилади хабарда.

Шунингдек, матбуот анжуманида кўприк ва йўллар қурилишида лойиҳа институтлари монополияси тугатилгани, бундан буён объектлар очиқ тендер савдолари орқали қурилиши таъкидланган.

Аввалроқ Мирзо Улуғбек туманида банк ходими фуқароларнинг 170 млн сўм пенсия ва нафақа пулларини ўзлаштиргани, Самарқандда мактаб қурган фирманинг раҳбарлари 631,7 млн сўм маблағни ўзлаштиргани ҳамда Ангрен шаҳар ободонлаштириш бошқармаси собиқ раҳбари 638 млн сўмни талон-торож қилгани ҳақида хабар берилганди.