O‘zbekistonda mehnat qonunchiligi buzilishi 2020-yilda qaysi sohalarda eng ko‘p qayd etilgani ma’lum qilindi

O‘zbekiston Bandlik va mehnat munosabatlari vazirligining Davlat mehnat inspeksiyasi 2020-yilda bandlik va mehnatni muhofaza qilish bo‘yicha 2020-yil davomida 19 226 ta korxonada 40 081 ta qonun buzilishi holatlarini aniqladi. Bu haqda vazirlik matbuot xizmati xabar berdi.

Ularni bartaraf etish bo‘yicha 10 764 ta yozma ko‘rsatmalar va 195 ta taqdimnomalar kiritilgan, 6 578 nafar mansabdor shaxslarga nisbatan 11 milliard 64 million so‘mdan ortiq ma’muriy jarimalar qo‘llanilgan. 1 141 nafar fuqaroning qariyb 3,6 milliard so‘m miqdordagi ish haqlari undirib berilgan.

Xabarda aytilishicha, aniqlangan qonun buzilishlaridan 11 621 tasi mehnatni muhofaza qilish qonunchiligi va texnika xavfsizligi qoidalariga amal qilmaslik, 2 915 tasi mehnat shartnoma tuzmasdan, norasmiy ravishda xodimlar mehnatidan foydalanish, 4 301 tasi ish haqini belgilangan muddatlarda to‘lab bermaslik, 1 078 tasi mehnat daftarchalarini yuritish tartibini buzish, 1 517 tasi noqonuniy ishdan bo‘shatishga oid. Shuningdek, 62 ta majburiy mehnat holatlari, 177 ta nogironligi bo‘lgan shaxslar uchun maxsus ish o‘rinlarini band qilmaslik va boshqa mehnat huquqlarini buzilishi holatlari aniqlangan.

Eng ko‘p qonun buzilishlari xalq ta’limi va sog‘liqni saqlash tizimida aniqlangan —  4 731 ta holatda xalq ta’limi tizimidagi tashkilot va umumta’lim maktablari mansabdor shaxslari o‘qituvchi va boshqa xodimlarining mehnat huquqlarini buzgan, 6 600 ta holatda qonun buzilishlari tibbiyot muassasalarida qayd etilgan. Qolgan qonun buzilishi holatlari qurilish sohasi (1 397 ta), sanoat korxonalari (1 094 ta), qishloq xo‘jaligi (986 ta), oliy va o‘rta maxsus ta’lim muassasalari (667 ta), transport sohasiga (509 ta) to‘g‘ri kelgan.

Vazirlikning ma’lum qilishicha, fuqarolarning kafolatlangan mehnat huquqlarini ta’minlash va majburiy Bandlik va mehnat munosabatlari vazirligining doimiy tarzda faoliyat olib boruvchi, o‘zining shaxsini oshkor qilmasdan ma’lumot berish imkoni bo‘lgan ijtimoiy tarmoqda dmi.mehnat.uz sayti, qisqa raqamli 1176 ishonch telefoni va @mehnathuquqbot Telegram tarmog‘i tashkil etilgan.