Amerikalik olimlar ilgari COVID-19 bilan kasallanganlarda koronavirus infeksiyasining ikkinchi to‘lqini kuzatilishiga sabab tanada immunitetning zaifligi oqibatida infeksiyani qayta yuqtirish yoki organizmda qolib ketgan virusni qayta faollashtirish bo‘lishi mumkinligini ta’kidlamoqda. Bu haqda “RIA Novosti” xabar berdi.
COVID-19’ga qayta chalinish holatlari kamdan kam uchraydi. Bu tarzda kasallanish infeksiyani qayta yuqtirish bilan bog‘liqmi yoki tanada virusning uzoq muddat saqlanishi oqibatidami, olimlar hozircha aniq ayta olmaydi.
Yel universiteti tibbiyot fakultetining tadqiqotchilari koronavirusdan tuzalganidan so‘ng to‘rt oy o‘tib virus bilan qayta kasallangan erkak haqida ma’lumot berdi. 40 yoshli erkak birinchi marta kasalxonaga 2020-yilning aprelida yotqizilgan. Bemor kasalxonaga nafas yetishmovchiligi va xirillash bilan kelgan. Bundan tashqari, bemorda ahvolni og‘irlashtiruvchi bir qator omillar—ikkinchi toifadagi qandli diabet, qalqonsimon bez yetishmovchiligi va semirish mavjud bo‘lgan.
Nafas yetishmovchiligi zo‘raygach unga sun’iy nafas oldirish apparati, antikoagulyant va boshqa preparatlar buyurilgan. Kasalxonada kechgan ikki oy davomida bemorda MRSA infeksiyasi, oshqozon-ichakdan qon ketish, pnevmoniya va buyrak yetishmovchiligi kabi jiddiy asoratlar zo‘raygan. Ammo oxir-oqibat u sog‘ayib, kasalxonadan chiqqan.
Keyingi uch oy ichida bemor koronavirusga qarshi uch marta test topshirdi, ularning barchasi salbiy chiqqan. To‘rtinchi oy, 2020-yil avgust oyida yana bir PZR tekshiruvidan o‘tgach unda SARS-CoV-2 uchun ijobiy natija aniqlangan va ikki haftadan keyin erkak nafas qisilishi bilan yana kasalxonaga yotqizilgan.
Bu safar kasallik ancha yengil kechib, bemor kasalxonada faqat bir hafta yotgan. Erkak shifokorlarga birinchi marta kasalxonaga yotqizilganidan keyin COVID-19 alomati bo‘lmagan kishilar va test natijalari salbiy chiqqan yaqin qarindoshlaridan boshqa deyarli hech kim bilan aloqada bo‘lmaganini ta’kidlagan.
AQSh Kasalliklarni nazorat qilish va oldini olish markazi (CDC) o‘z tavsiyalarida COVID-19’ga qayta chalinishga sabab infeksiyani qayta yuqtirishdan ko‘ra dastlabki infeksiyadan keyingi 90 kun ichida tanada qolgan virusning qayta faollashishi deb ko‘rsatadi. Ammo dastlabki infeksiyadan keyin ancha vaqt o‘tganligi bois tadqiqotchilar o‘z bemorlarida ikkita alohida infeksiya epizodi bo‘lgan degan xulosaga keldi. Bemorlar virusga ikkinchi bor chalinganda tanada avvalgi kasallanishdan qolgan immunitet tufayli kasallik yengil kechadi.
COVID-19 pandemiyasi rivojlanib borayotganligi sababli koronavirusga qayta chalinish ehtimoli to‘g‘risidagi xabarlar paydo bo‘lmoqda, biroq koronavirusga qayta chalinish har doim ham tanada qolgan virusning qayta faollashishini anglatmaydi, deyiladi xabarda.
Izoh (0)