Америкалик олимлар COVID-19’га қайта чалиниш сабабларини маълум қилди

Америкалик олимлар илгари COVID-19 билан касалланганларда коронавирус инфекциясининг иккинчи тўлқини кузатилишига сабаб танада иммунитетнинг заифлиги оқибатида инфекцияни қайта юқтириш ёки организмда қолиб кетган вирусни қайта фаоллаштириш бўлиши мумкинлигини таъкидламоқда. Бу ҳақда «РИА Новости» хабар берди.

COVID-19’га қайта чалиниш ҳолатлари камдан кам учрайди. Бу тарзда касалланиш инфекцияни қайта юқтириш билан боғлиқми ёки танада вируснинг узоқ муддат сақланиши оқибатидами, олимлар ҳозирча аниқ айта олмайди.

Ел университети тиббиёт факультетининг тадқиқотчилари коронавирусдан тузалганидан сўнг тўрт ой ўтиб вирус билан қайта касалланган эркак ҳақида маълумот берди. 40 ёшли эркак биринчи марта касалхонага 2020 йилнинг апрелида ётқизилган. Бемор касалхонага нафас етишмовчилиги ва хириллаш билан келган. Бундан ташқари, беморда аҳволни оғирлаштирувчи бир қатор омиллар—иккинчи тоифадаги қандли диабет, қалқонсимон без етишмовчилиги ва семириш мавжуд бўлган.

Нафас етишмовчилиги зўрайгач унга сунъий нафас олдириш аппарати, антикоагулянт ва бошқа препаратлар буюрилган. Касалхонада кечган икки ой давомида беморда МРСА инфекцияси, ошқозон-ичакдан қон кетиш, пневмония ва буйрак етишмовчилиги каби жиддий асоратлар зўрайган. Аммо охир-оқибат у соғайиб, касалхонадан чиққан.

Кейинги уч ой ичида бемор коронавирусга қарши уч марта тест топширди, уларнинг барчаси салбий чиққан. Тўртинчи ой, 2020 йил август ойида яна бир ПЗР текширувидан ўтгач унда SARS-CoV-2 учун ижобий натижа аниқланган ва икки ҳафтадан кейин эркак нафас қисилиши билан яна касалхонага ётқизилган.

Бу сафар касаллик анча енгил кечиб, бемор касалхонада фақат бир ҳафта ётган. Эркак шифокорларга биринчи марта касалхонага ётқизилганидан кейин COVID-19 аломати бўлмаган кишилар ва тест натижалари салбий чиққан яқин қариндошларидан бошқа деярли ҳеч ким билан алоқада бўлмаганини таъкидлаган.

АҚШ Касалликларни назорат қилиш ва олдини олиш маркази (CДC) ўз тавсияларида COVID-19’га қайта чалинишга сабаб инфекцияни қайта юқтиришдан кўра дастлабки инфекциядан кейинги 90 кун ичида танада қолган вируснинг қайта фаоллашиши деб кўрсатади. Аммо дастлабки инфекциядан кейин анча вақт ўтганлиги боис тадқиқотчилар ўз беморларида иккита алоҳида инфекция эпизоди бўлган деган хулосага келди. Беморлар вирусга иккинчи бор чалинганда танада аввалги касалланишдан қолган иммунитет туфайли касаллик енгил кечади.

COVID-19 пандемияси ривожланиб бораётганлиги сабабли коронавирусга қайта чалиниш эҳтимоли тўғрисидаги хабарлар пайдо бўлмоқда, бироқ коронавирусга қайта чалиниш ҳар доим ҳам танада қолган вируснинг қайта фаоллашишини англатмайди, дейилади хабарда.