Бухоро вилоятида портлаш содир бўлган кўп қаватли уйда табиий газ бўйича синовлар тегишли идоралар рухсатисиз амалга оширилгани маълум бўлди. Бу ҳақда «Ҳудудгаз Бухоро» газ таъминоти филиали раҳбари Ўктам Абдиев хабар берди.
«Дарё» мухбири билан суҳбатлашган «Ҳудудгаз Бухоро» газ таъминоти филиали раҳбари Ўктам Абдиев янги қурилаётган кўп қаватли бинода ўрнатилган табиий газдан фойдаланишига рухсат берилмаганини айтди.
«Аввало, ҳар бир ҳудудни газлаштириш учун белгиланган техник шартлар бўйича меъёрий лойиҳа ҳужжатлар тайёрланади. Мазкур манзил бўйича ҳам техник шартлар берилган, лойиҳа ҳужжатлар тайёрланган ва шу асосида табиий газга уланиш учун қурилиш-монтаж ишлари олиб борилган. Газ қувурларини улаш ишлари якунлангач эса қурилиш корхонаси ‘Бухоро шаҳаргаз’ таъминотига уни фойдаланишга қабул қилиш учун техник ҳужжатлар тайёрлаши лозим бўлган. Бу жараён синов деб юритилади. Синовга асосангина вилоят ҳудудгаз ходимлари газдан фойдаланишга рухсат беради. Унга қадар ходимлар газ қувурлари ишлашини, меъёрий хавфсизлик, чидамлилик ва мустаҳкамлигини синовдан ўтказади. Афсуски, мазкур жараёнда ушбу амаллар бажарилмаган. Айни пайтда ушбу масалага экспертлар муҳокамаси орқали ҳам аниқлик киритяпмиз», — деди Ўктам Абдиев.
Масъулнинг айтишича, дастлабки суриштирувлардан сўнг кўп қаватли уйда табиий газдан фойдаланишга рухсат берилмагани аниқланган.
Эслатиб ўтамиз, аввалроқ Бухородаги кўп қаватли уй портлаши оқибатида 12 киши жароҳатлангани, ҳолат юзасидан жиноий иш қўзғатилгани хабар қилинганди.
Изоҳ (0)