Қўшма Штатларда COVID-19’га чалиниш ҳолати ва унинг оқибатида касалхонага ётқизилаётганлар сони камаймоқда. Бу ҳақда АҚШ касалликларни назорат қилиш маркази (CDC) раҳбари Рошель Валенскининг маълумотига асосланиб «Интерфакс» хабар берди.
«Айни пайтда биз касаллик изчил пасайиб бораётган йўлдамиз»,— деди Валенски.
Коронавирус инфекциясига чалиниш бўйича кунлик энг юқори кўрсаткич 8 январь куни қайд этилганди, аммо кейинчалик мазкур кўрсаткич 13,4 фоизга камайди, дейилади хабарда. 26 январь—1 февраль кунлари мамлакатда кунига ўртача 144 мингта янги ҳолат аниқланди.
Қурбонлар сони кўпайишда давом этса-да, ўлим даражаси секинлашмоқда. «Яқин кунларда кузатилаётган касалхонага ётқизилаётганлар сонининг камайиши келгуси ҳафталарда ўлим сонининг ҳам қисқаришига умид бермоқда», — деди Валенски.
Қўшма Штатлар коронавирус юқтирганлар ва касаллик қурбонлари сонининг кўплиги бўйича дунёда биринчи ўринда бормоқда. Пандемия бошланганидан бери мамлакатда 27 миллиондан ортиқ COVID-19’га чалиниш ҳолати аниқланаган, 457 мингдан ортиқ бемор вафот этган.
Эслатиб ўтамиз, собиқ президент Дональд Трамп АҚШда коронавирус билан боғлиқ вазиятга доир маълумотлар ҳаддан ташқари бўрттирилган, бунга касалланганлар ва вафот этганлар сонини ҳисоблаш бўйича CДC қўллаётган усул сабабчи, дея таъкидлаганди.
Оқ уй эса коронавируснинг «америкача» штамми пайдо бўлган бўлиши мумкинлигини маълум қилган.
Изоҳ (0)