Dunyoda koronavirusning fevral oyidagi tarqalish sur’ati 2021-yilning yanvar oyiga solishtirganda ikki barobarga pasaydi. Bunday ma’lumotlar har seshanba kuni JSST tomonidan yangilanib boriladi, deb xabar bermoqda “TASS”.
O‘tgan bir kun davomida ro‘yxatga olingan 445,5 mingta koronavirusga chalinish holati yil boshidan buyon eng minimal ko‘rsatkichlardan biri hisoblanadi. Bundan kamroq holat 26-yanvar kuni ro‘yxatga olindi (424,2 ming). Bu yil hisobidagi eng maksimal ko‘rsatkich esa 870,8 ming kishi — 10-yanvarda kuzatilgan.
“TASS”ning hisob-kitoblariga ko‘ra, virus tarqalishining sekinlashishi virus bilan eng ko‘p zararlangan 20 ta davlatda kuzatilmoqda. AQShda bir kun davomida 125,5 mingta holat qayd etildi. Yanvar oyida ro‘y bergan eng yuqori natijalarga taqqoslaganda, bu ikki barobar kam natija. Braziliya, Kolumbiya va Argentinada ham bu ko‘rsatkich ikki barobardan ortiqqa kamaygan. Eng ijobiy ko‘rsatkich esa Meksikada — bu davlatda virus tarqalishi uch barobarga sekinlashdi. Umumiy tendensiyadan farqli ravishda Peruda ikki oylik virusning keng tarqalishidan keyin, fevral oyida bu ko‘rsatkich yangi bosqichga chiqdi.
Yevropada ham virus tarqalish sur’atining sekinlashishi virusdan eng ko‘p zararlangan 20 ta mamlakatda kuzatildi. Italiyada o‘tgan bir kun davomida sakkiz mingta holat ro‘yxatga olindi, bu oktabr oyiga solishtirganda sezilarli darajada oz. Chexiyada esa yanvar oyiga solishtirganda kasallik o‘sishi olti marta, Germaniyada to‘rt marta, Buyuk Britaniya, Polsha va Ukrainada uch martadan ko‘proq pasayish ro‘y berdi. Ispaniya esa virus tarqalish tezligi bo‘yicha yanvar oyining birinchi o‘n kunligida uchinchi o‘ringa chiqqan edi, bu pandemiya davomidagi eng salbiy ko‘rsatkich.
O‘tgan bir kun davomida Hindistonda 8,6 ming zararlanish holati aniqlandi, bu iyun oyidan buyon eng past ko‘rsatkich va eng yuqori natijalarga solishtirganda 12 barobarga kam. Turkiyada 8 mingdan kamroq holat ro‘yxatga olindi, bu yanvar oyining maksimal holatlariga taqqoslaganda ikki barobar, dekabr oyining eng yuqori ko‘rsatkichlariga solishtirganda to‘rt barobarga kam. Eronda kasallikka chalinish holatlari barqaror holatda — kuniga 6-6,5 mingta holat va bu noyabr oyiga solishtirganda ikki barobar kamroq. Indoneziya bundan mustasno, bu davlatda virus tarqalish sur’ati o‘sib bormoqda (kuniga 12-14 ming holat). Barqaror pasayish JARda kuzatilyapti, o‘tgan bir kun davomida 2,5 mingta holat qayd etildi, dekabr oyiga solishtirganda bu minimal ko‘rsatkich. Yanvar oyida kuniga 20 mingtagacha holat aniqlangan.
JSST ma’lumotlariga ko‘ra, pandemiya boshidan buyon dunyoda 102,5 million virusga chalinish holati qayd etilgan, ularning 2,2 million nafari virus qurboniga aylangan. Dunyoning 19 davlatida virus bilan kasallanish holati bir milliondan oshgan. Bu ro‘yxatga Chexiya 987,3 ming ko‘rsatkich bilan yakun yasagan.
Izoh (0)