Vyetnamda mamlakatning 10 ta viloyat va shaharlari bo‘ylab koronavirusning tarqalishiga virusning yuqumliroq bo‘lgan “britancha” turi sabab bo‘ldi. Bu haqda Vyetnam sog‘liqni saqlash vaziri Nguyen Txan Long bergan ma’lumotga tayanib “Interfaks” yozmoqda.
“Genetik tadqiqotlar shuni ko‘rsatdiki, 276 ta yangi bemorning 12 tasi koronavirusning Buyuk Britaniyada paydo bo‘lgan shtammi bilan kasallangan, ammo kasallikni yuqtirish manbasi noma’lum bo‘lib qolmoqda”, — dedi vazir.
Uning ta’kidlashicha, shimoliy Xayziong provinsiyasida virus aniqlanganidan olti kun o‘tgach hukumat kasallik o‘chog‘ini nazoratga olishga muvaffaq bo‘lgan, ammo 20 ta holat qayd etilgan Xanoyda vaziyatni normal holatga keltirish ko‘proq vaqt talab etadi. Vazirning ta’kidlashicha, Sog‘liqni saqlash vazirligi Xanoyda test o‘tkazish hajmini kuniga 40 mingtaga yetkazish niyatida.
Eslatib o‘tamiz, Vyetnamda ommaviy testlar va qat’iy karantin choralari tufayli virusga chalinish bo‘yicha atigi 1851 ta holat, kasallik oqibatida 35 ta o‘lim qayd etilgan.
Vyetnam hukumati 30-yanvar kuni AstraZeneca vaksinasini ma’qullagan. Avvalroq hukumatning 30 million dozali dori-darmon sotib olish bo‘yicha muzokaralar olib borayotgani haqida xabar berilgandi. Mart oyiga qadar mamlakatga 50 ming dozada vaksinaning birinchi partiyasi kelishi kutilmoqda.
Ma’lumot uchun, nemis mutaxassislari AstraZeneca vaksinasini 65 yoshdan oshganlarga tavsiya etmagan. Ular 65 yoshdan oshganlar uchun preparatning samarali ekaniga oid dalillar yetarli emas, deb hisoblagan. Kompaniya esa Buyuk Britaniyaning vaksinatsiya va immunizatsiya bo‘yicha birlashgan qo‘mitasi tomonidan AstraZeneca’ni keksalarda qo‘llash ma’qullangani va emlanganlarda immunitet miqdori ortayotganini ta’kidlagan.
Avvalroq Germaniya koronavirus uchun zaxira vaksinalarga buyurtma bergani haqida xabar berilgandi. Italiyada esa koronavirusga qarshi emlash rejasi tahdid ostida: mamlakat vaksina tanqisligi muammosiga duch keldi.