Дунёда коронавируснинг февраль ойидаги тарқалиш суръати 2021 йилнинг январь ойига солиштирганда икки баробарга пасайди. Бундай маълумотлар ҳар сешанба куни ЖССТ томонидан янгиланиб борилади, деб хабар бермоқда «ТАСС».
Ўтган бир кун давомида рўйхатга олинган 445,5 мингта коронавирусга чалиниш ҳолати йил бошидан буён энг минимал кўрсаткичлардан бири ҳисобланади. Бундан камроқ ҳолат 26 январь куни рўйхатга олинди (424,2 минг). Бу йил ҳисобидаги энг максимал кўрсаткич эса 870,8 минг киши — 10 январда кузатилган.
«ТАСС»нинг ҳисоб-китобларига кўра, вирус тарқалишининг секинлашиши вирус билан энг кўп зарарланган 20 та давлатда кузатилмоқда. АҚШда бир кун давомида 125,5 мингта ҳолат қайд этилди. Январь ойида рўй берган энг юқори натижаларга таққослаганда, бу икки баробар кам натижа. Бразилия, Колумбия ва Аргентинада ҳам бу кўрсаткич икки баробардан ортиққа камайган. Энг ижобий кўрсаткич эса Мексикада — бу давлатда вирус тарқалиши уч баробарга секинлашди. Умумий тенденциядан фарқли равишда Перуда икки ойлик вируснинг кенг тарқалишидан кейин, февраль ойида бу кўрсаткич янги босқичга чиқди.
Европада ҳам вирус тарқалиш суръатининг секинлашиши вирусдан энг кўп зарарланган 20 та мамлакатда кузатилди. Италияда ўтган бир кун давомида саккиз мингта ҳолат рўйхатга олинди, бу октябрь ойига солиштирганда сезиларли даражада оз. Чехияда эса январь ойига солиштирганда касаллик ўсиши олти марта, Германияда тўрт марта, Буюк Британия, Польша ва Украинада уч мартадан кўпроқ пасайиш рўй берди. Испания эса вирус тарқалиш тезлиги бўйича январь ойининг биринчи ўн кунлигида учинчи ўринга чиққан эди, бу пандемия давомидаги энг салбий кўрсаткич.
Ўтган бир кун давомида Ҳиндистонда 8,6 минг зарарланиш ҳолати аниқланди, бу июнь ойидан буён энг паст кўрсаткич ва энг юқори натижаларга солиштирганда 12 баробарга кам. Туркияда 8 мингдан камроқ ҳолат рўйхатга олинди, бу январь ойининг максимал ҳолатларига таққослаганда икки баробар, декабрь ойининг энг юқори кўрсаткичларига солиштирганда тўрт баробарга кам. Эронда касалликка чалиниш ҳолатлари барқарор ҳолатда — кунига 6-6,5 мингта ҳолат ва бу ноябрь ойига солиштирганда икки баробар камроқ. Индонезия бундан мустасно, бу давлатда вирус тарқалиш суръати ўсиб бормоқда (кунига 12-14 минг ҳолат). Барқарор пасайиш ЖАРда кузатиляпти, ўтган бир кун давомида 2,5 мингта ҳолат қайд этилди, декабрь ойига солиштирганда бу минимал кўрсаткич. Январь ойида кунига 20 мингтагача ҳолат аниқланган.
ЖССТ маълумотларига кўра, пандемия бошидан буён дунёда 102,5 миллион вирусга чалиниш ҳолати қайд этилган, уларнинг 2,2 миллион нафари вирус қурбонига айланган. Дунёнинг 19 давлатида вирус билан касалланиш ҳолати бир миллиондан ошган. Бу рўйхатга Чехия 987,3 минг кўрсаткич билан якун ясаган.
Изоҳ (0)