“90 foizi bir tiyinga qimmat”. Rejissor Rustam Sa’diyev hozirgi o‘zbek seriallari haqida (video)

Rejissor Rustam Sa’diyev hozirgi kunda suratga olinayotgan o‘zbek seriallarining 90 foizi bir tiyinga qimmat deb aytdi.

Rejissor bu haqda YashinTV’ga bergan qisqa intervyusida aytib o‘tgan.

“Boy va nonvoy” deb nomlangan serial ustida ish boshladim. Suratga olmasam bo‘lmadi, qo‘yishmadi, “shu ko‘chaga kirib ko‘ray, mayli”, deb ish boshladim. Eng zo‘r seriallardan biri bo‘lsa kerak deb o‘ylayman. G‘oyasi ham original.

Hozir serial olamida raqobat bor deb hisoblamayman. Achinadigan joylarim ko‘p. Aksariyat seriallar xalqning didini buzmoqda. Menga qolsa hozirgi 90 foiz olinayotgan seriallarni, keskin, jiddiy badiiy kengashdan o‘tkazar edim. Xalqning tafakkurini buzmoqda, odamlarni janjalga, buzuqlikka o‘rgatmoqda. Hayotda qanaqa holat bo‘lishidan qat’i nazar uni san’at tilida ko‘rsata olish kerak. Afsuski unday narsa bo‘lmayapti. O‘zbekistonda 90 foiz olinayotgan seriallar umuman keng ommaning tafakkurini zaharlayapti deb hisoblayman.

Xudo xohlasa men olmoqchi bo‘layotgan serial o‘sha 10 foizning ichida bo‘ladigan serial bo‘ladi. “Daydi qizning daftari”, “Qodirxon” deb nomlangan seriallar menimcha yaxshi seriallar bo‘lsa kerak deb o‘ylayman.

Qolgan seriallarga afsuslanaman, ular yaxshilikka, ezgulikka, musulmonchilik asoslariga qurilmayapti. Ular xalqimiz, yoshlarimiz tafakkuriga yaxshi motivatsiya bo‘la olmayapti. Oddiy tomoshabin tili bilan aytganda bir tiyinga qimmat deb hisoblayman.

Serial olish niyatim yo‘q edi, lekin olmasam bo‘lmaydi deb boshladim, ishonaman bu serial oila bilan bemalol ko‘rsa bo‘ladigan serial bo‘ladi.

Rustam Sa’diyev, rejissor