Shvetsiyalik hamshira Liza Enrot izolyatsiyalangan Xamneskar orolida yolg‘iz o‘zi Gyoteborg kinofestivali dasturini tomosha qilish bo‘yicha tanlovni yutib oldi. Enrot bir hafta davomida festival dasturi doirasida 60 ta filmni Pater Noster mayog‘ida o‘tirib tomosha qiladi. U telefon, kompyuter, kino va boshqa ko‘ngilochar o‘yinlardan foydalanmaydi, deb xabar beradi Esquire.
30-yanvar kuni Enrot qayiqda orolga yetkazilgan. U dunyoning 45 mamlakatidan yuborilgan 12 ming arizachi orasidan tanlab olingan. Shevde shahrida ishlagan hamshira koronavirusga qarshi kurashda yordam berish bilan shug‘ullangan. Bundan tashqari, Enrot o‘z shahridagi mahalliy kinoklub a’zosi hisoblanadi.
Mayoqda filmlarni tomosha qilish uchun ekran o‘rnatilgan. Enrotga faqat planshet beriladi, uning yordamida kunlik videokundalikni yuritish mumkin. Shuningdek, orolda yana bir kishi bo‘lib, u har kuni hamshiradan xabar olib turadi.
Pandemiya sabab festival to‘liq onlayn platformaga o‘tkazilgan. Barcha filmlar va muhokamalarni tomoshabinlar internetda kuzatishi mumkin. Festival tashkilotchilarining ta’kidlashicha, bu kabi g‘oya festivalni o‘tkazishning nafaqat to‘liq xavfsizligini ta’minlashga yordam beradi, balki pandemiya kinoga qanday ta’sir ko‘rsatganini o‘rganishga yordam beradi.
Enron og‘ir ishdan keyin juda ham charchab ketganini ta’kidlagan. “Shamol, dengiz, bir haftaga umuman boshqa reallikda bo‘lish imkoniyati — bularning barchasi haqiqatan hayratlanarli”, — deydi Enrot.
Izoh (0)