«90 фоизи бир тийинга қиммат». Режиссёр Рустам Саъдиев ҳозирги ўзбек сериаллари ҳақида (видео)

Режиссёр Рустам Саъдиев ҳозирги кунда суратга олинаётган ўзбек сериалларининг 90 фоизи бир тийинга қиммат деб айтди.

Режиссёр бу ҳақда Yashin TV’га берган қисқа интервьюсида айтиб ўтган.

«Бой ва нонвой» деб номланган сериал устида иш бошладим. Суратга олмасам бўлмади, қўйишмади, «шу кўчага кириб кўрай, майли», деб иш бошладим. Энг зўр сериаллардан бири бўлса керак деб ўйлайман. Ғояси ҳам оригинал.

Ҳозир сериал оламида рақобат бор деб ҳисобламайман. Ачинадиган жойларим кўп. Аксарият сериаллар халқнинг дидини бузмоқда. Менга қолса ҳозирги 90 фоиз олинаётган сериалларни, кескин, жиддий бадиий кенгашдан ўтказар эдим. Халқнинг тафаккурини бузмоқда, одамларни жанжалга, бузуқликка ўргатмоқда. Ҳаётда қанақа ҳолат бўлишидан қатъи назар уни санъат тилида кўрсата олиш керак. Афсуски ундай нарса бўлмаяпти. Ўзбекистонда 90 фоиз олинаётган сериаллар умуман кенг омманинг тафаккурини заҳарлаяпти деб ҳисоблайман.

Худо хоҳласа мен олмоқчи бўлаётган сериал ўша 10 фоизнинг ичида бўладиган сериал бўлади. «Дайди қизнинг дафтари», «Қодирхон» деб номланган сериаллар менимча яхши сериаллар бўлса керак деб ўйлайман.

Қолган сериалларга афсусланаман, улар яхшиликка, эзгуликка, мусулмончилик асосларига қурилмаяпти. Улар халқимиз, ёшларимиз тафаккурига яхши мотивация бўла олмаяпти. Оддий томошабин тили билан айтганда бир тийинга қиммат деб ҳисоблайман.

Сериал олиш ниятим йўқ эди, лекин олмасам бўлмайди деб бошладим, ишонаман бу сериал оила билан бемалол кўрса бўладиган сериал бўлади.

Рустам Саъдиев, режиссёр