Qoraqalpog‘istonda mast haydovchi boshqaruvidagi Nexia-3 yo‘l chetida turgan beshta mashinaga borib urildi (video)

Qoraqalpog‘istonda mast holda avtomobil boshqargan haydovchi YTHga uchrab, yo‘l chetidagi 5 ta mashinani pachoq qildi. Bu haqda IIV YHXBB axborot xizmati xabar berdi.

Ma’lum qilinishicha, 30-yanvar kuni soat 16:00 larda Qoraqalpog‘iston Respublikasi Nukus shahar hududidan o‘tgan A-380 G‘uzor—Buxoro—Nukus—Beyneu xalqaro ahamiyatdagi avtomobil yo‘lining 771-kilometrida 1971-yilda tug‘ilgan haydovchi U.R. Nexia-3 rusumli avtomobilda harakatlanayotib, boshqaruvni yo‘qotgan va qarama-qarshi tomonga o‘tib ketgan. Natijada yo‘l chetida to‘xtab turgan 2 ta Lacetti, Damas, Spark hamda Cobalt rusumli avtomobillarga urilgan.

Hodisa oqibatida Nexia-3 rusumli avtomobil haydovchisi 50 yoshli U.R.ga birinchi tez tibbiy yordam ko‘rsatilgan. Transport vositalari texnik shikastlangan. Surishtiruv ishlari davomida haydovchi U.R. mast holda avtomobil boshqarganligi ma’lum bo‘lgan.

“Mazkur YTH yuzasidan Nukus shahar IIO FMB YHXB tomonidan surishtiruv ishlari olib borilmoqda”, — deyiladi xabarda.

Avvalroq Toshkentda Malibu yo‘l chetida to‘xtab turgan 2 ta Lacetti’ga urilib, ag‘darilib ketgani to‘g‘risida xabar berilgandi.