Sportga ajratiladigan 100 mlrd so‘mdan O‘zbekistondagi har bir bog‘chaga 2 millionlik, maktablarga 5 millionlik sport jihozlari olinadi

O‘zbekistonda davlat budjetidan sportga ajratiladigan 100 milliard so‘mga har bitta bog‘cha va maktablar uchun sport jihozlari sotib olinadi. Bu haqda 1-fevral kuni Milliy matbuot markazida bo‘lib o‘tgan anjumanda Jismoniy tarbiya va sport vazirligi boshqarma boshlig‘i Muzaffarxo‘ja Raxmatxo‘jayev ma’lum qildi, deya xabar qilmoqda “Daryo” muxbiri.

“Joriy 2021-yilda 16 mingta bog‘cha va maktablarni sport jihozlari bilan ta’minlashga davlat budjetidan 100 milliard so‘m ajratiladi. Ajratilgan mablag‘ har bitta maktabgacha ta’lim muassasalariga 2 million so‘mlik va umumta’lim maktablariga 5 million so‘mlik sport jihozlarini sotib olish uchun sarflanadi”, — dedi Muzaffarxo‘ja Raxmatxo‘jayev.

Ta’kidlanishicha, 2021-yilda yoshlar o‘rtasida sportni yana-da targ‘ib qilish maqsadida, chekka-chekka tumanlarda 10 dan ortiq hamda shaharda, aholi zich joylarda 20 dan ortiq Bolalar va o‘smirlar sport maktablari quriladi.

Bundan tashqari, sport murabbiylari umumta’lim maktablarida mavjud bo‘lgan sport zallarda darsdan so‘ng bolalarni bepul shug‘ullantirish uchun barcha sharoitlar yaratilgan.

“Albatta, sportda yaxshi natijaga erishish uchun sportchilar shug‘ullanishi, yaxshi sharoitlar bilan ta’minlanishi kerak. Ajratilayotgan bu mablag‘ sport jihozlarini sotib olishga arziydi”, — dedi Muzaffarxo‘ja Raxmatxo‘jayev.

Avvalroq Shavkat Mirziyoyev vazirlikka sportni targ‘ib qilish uchun 2021-yil 1-martdan boshlab taniqli va muvaffaqiyatga erishgan sportchilarni maktablarga biriktirish hamda tajriba tariqasida Sirdaryo viloyatida oilaviy nodavlat sport ta’limi tizimini tashkil qilish bo‘yicha topshiriq bergan edi.