Ўзбекистонда давлат бюджетидан спортга ажратиладиган 100 миллиард сўмга ҳар битта боғча ва мактаблар учун спорт жиҳозлари сотиб олинади. Бу ҳақда 1 февраль куни Миллий матбуот марказида бўлиб ўтган анжуманда Жисмоний тарбия ва спорт вазирлиги бошқарма бошлиғи Музаффархўжа Рахматхўжаев маълум қилди, дея хабар қилмоқда «Дарё» мухбири.
«Жорий 2021 йилда 16 мингта боғча ва мактабларни спорт жиҳозлари билан таъминлашга давлат бюджетидан 100 миллиард сўм ажратилади. Ажратилган маблағ ҳар битта мактабгача таълим муассасаларига 2 миллион сўмлик ва умумтаълим мактабларига 5 миллион сўмлик спорт жиҳозларини сотиб олиш учун сарфланади», — деди Музаффархўжа Рахматхўжаев.
Таъкидланишича, 2021 йилда ёшлар ўртасида спортни яна-да тарғиб қилиш мақсадида, чекка-чекка туманларда 10 дан ортиқ ҳамда шаҳарда, аҳоли зич жойларда 20 дан ортиқ Болалар ва ўсмирлар спорт мактаблари қурилади.
Бундан ташқари, спорт мураббийлари умумтаълим мактабларида мавжуд бўлган спорт залларда дарсдан сўнг болаларни бепул шуғуллантириш учун барча шароитлар яратилган.
«Албатта, спортда яхши натижага эришиш учун спортчилар шуғулланиши, яхши шароитлар билан таъминланиши керак. Ажратилаётган бу маблағ спорт жиҳозларини сотиб олишга арзийди», — деди Музаффархўжа Рахматхўжаев.
Аввалроқ Шавкат Мирзиёев вазирликка спортни тарғиб қилиш учун 2021 йил 1 мартдан бошлаб таниқли ва муваффақиятга эришган спортчиларни мактабларга бириктириш ҳамда тажриба тариқасида Сирдарё вилоятида оилавий нодавлат спорт таълими тизимини ташкил қилиш бўйича топшириқ берган эди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)