31-yanvar kuni Rossiyaning turli shaharlarida siyosatchi Aleksey Navalniyni qo‘llab-quvvatlab o‘tkazilgan aksiyalarda ayni paytga qadar 5362 kishi qo‘lga olingan. Bunday ma’lumotlarni “OVD-Info” keltirib o‘tdi.
Meduza yozishicha, bu ushbu tashkilot (2011-yil dekabrda asos solingan) kuzatuvlarining butun tarixi mobaynidagi qo‘lga olishlar bo‘yicha mutlaq rekord ko‘rsatkich hisoblanadi.
Eng ko‘p odamlar Moskvada hamda Sankt-Peterburgda qo‘lga olingan, undan keyinda Krasnoyarsk, Nijniy Novgorod, Tver va boshqa shaharlar bormoqda.
Namoyishlar bu safar ham o‘nlab shaharlarda bo‘lib o‘tdi — ba’zi joylarda bir hafta avvalgidan ham ko‘proq odamlar ko‘chalarga chiqdi. Yekaterinburg va Novosibirskdagi namoyishlar eng ko‘p ishtirokchilarni o‘z ichiga olgani haqida mahalliy mustaqil OAVlar yozmoqda. Yekaterinburgda 7 ming, Novosibirskda — 5 ming kishi namoyishlarga chiqqan.
Aksiyalar boshlanishidan oldin Moskva va Sankt-Peterburg markazlari to‘sib qo‘yildi. Moskva ma’murlari 31-yanvar kuni markazda piyodalar harakati cheklanishi, metro stansiyalari, umumiy ovqatlanish joylari va do‘konlar yopiq bo‘lishi haqida oldindan ogohlantirgan edi. Peterburgda ham markaz shu tarzda to‘sib qo‘yildi, ammo bu haqda oldindan ma’lum qilinmagan edi. Oxir-oqibat, Navalniy tarafdorlari aksiyalarni Moskva va Peterburgning boshqa nuqtalariga ko‘chirdi.
Moskvada namoyishchilar Navalniy saqlanayotgan “Matrosskaya tishina” tergov izolyatoriga yurish uyushtirdi, u yerda politsiya tomonidan shafqatsizlik bilan tarqatildi. Aksiya ishtirokchilariga nisbatan kun davomida bir necha marta elektroshokerlar qo‘llanildi.
Peterburgda ham namoyishchilarga qarshi ko‘zni yoshlantiruvchi gaz va elektroshokerlar ishlatildi, ular dubinkalar bilan kaltaklandi va xizmat quroli bilan qo‘rqitildi.
Rossiyaning boshqa hududlarida ham odamlar ommaviy ravishda qo‘lga olindi, ularning ko‘pchiligi do‘pposlandi. Ko‘pchilik shaharlarda yana muxbirlar qo‘lga olindi.
Bunday mitinglar o‘tgan yakshanba kuni — 23-yanvarda ham Rossiyaning o‘nlab shaharlarida, shuningdek, chet elda — Avstraliya, Germaniya, Avstriya, Chexiya, Buyuk Britaniya, AQSh, Chernogoriya va boshqa mamlakatlarda ham bo‘lib o‘tgan edi. Aksiyalarda o‘n minglab odamlar qatnashdi, uch mingdan ziyod odam qo‘lga olindi.
Ayni paytda Navalniy Moskvadagi 1-raqamli tergov izolyatorida saqlanmoqda. Sud siyosatchini shartli sudlangan shaxsning xulq-atvor qoidalarini buzgan deb hisoblab, uni Federal jazoni ijro etish xizmatining talabiga binoan 30 kunga hibsga olgan va 15-fevralga qadar qamoqda bo‘lishini ma’lum qilgan.
Izoh (0)