«Реал»да ўз ўрнини топа олмаган Мартин Эдегор ва «Арсенал» ўртасидаги музокаралар кўп муҳокама қилинди. Кейинчалик трансфер расман эълон қилинди ҳам. Таниқли инсайдер Фабрицио Романонинг хабар беришича, музокараларда ҳал қилувчи омил бўлиб, лондонликлар бош мураббийи Микель Артетанинг шахсан ўзи футболчига қўнғироқ қилгани бўлган.
Хўш, ким ўзи Эдегор?
Эдегор 15 ёшида Норвегия чемпионатидаги биринчи учрашувини ўтказган. Дебют аввалроқ бўлиб ўтиши ҳам мумкин эди, аммо лига регламенти туфайли бунинг иложи бўлмаган. Худди шу ёшида у Норвегия миллий жамоасида ўйнаган энг ёш футболчига айланган. 16 ёшида эса у Мадрид клубига ушбу ёшдаги футболчи учун рекорд даражадаги 3 миллион евро эвазига кўчиб ўтади ва «Реал»да ҳам энг ёш дебютантга айланади. Шу тариқа Мартин 22 ёшда бўлишига қарамай, «Арсенал»га анча тажрибали футболчи сифатида келди.
«Арсенал» Ўзилдан қутулиши биланоқ Эдегор трансферини амалга оширди. Месут ҳатто Англия чемпионати қайдномасига ҳам киритилмаганди. Афтидан, барибир Артетега ўйин услуби Ўзилникига ўхшаш ўйинчи керак.
Айнан ҳужум билан «Арсенал» бу мавсумда, айниқса мавсум бошида муаммоларга дуч келди. Бир ярим ой олдин «Арсенал» голлар сони бўйича лигада 16-ўринни эгаллаб турганди, тўғри, ҳозир вазият бироз ўнгланди. Умумий зарбалар сони бўйича – 11-ўрин, аниқ зарбалар бўйича эса – 13-ўрин. Ва бу натижа Обамеянг, Ляказетт, Виллиан, Пепе ва бошқа ажойиб ҳужумчилар тўплами билан қайд этилмоқда.
Эдегор ҳақида нималар дейилмоқда?
ТалкСпорт мутахассиси Арнольд Кларк Эдегорнинг «Арсенал»даги вазиятни тўғрилашига ва жамоага Ўзил бериши керак бўлган нарсани бера олишига ишонмоқда: «Эдегор – Месут Ўзил сингари ўйинчи, плеймейкер, ‘ўнинчи рақам’. Эҳтимол, у Обамеянг ва Ляказеттни яхши паслар билан таъминлайди».
Норвегиялик Нидерландиянинг «Витесс»исидаги (ижарада ўйнаган) статистикаси ҳам бундан далолат бериши мумкин: ўшанда ярим ҳимоячи 9 та гол ва 12 та голли узатмани амалга оширганди, ҳар бир ўйинда ўртача 3,5 та ўткир пас. «Реал Сосьедад»даги навбатдаги ижара олдингиси билан солиштирилганда бироз ёмонроқ, аммо буни ҳам анча муваффақиятли деб ҳисоблаш мумкин: 4 та гол, 5 та ассист ва ҳар бир учрашувда ўртача 2 та ўткир пас.
Умуман олганда, ижараларда Мартин ўзини жуда ёрқин намойиш этган. Эдегор билан «Витесс»да бирга ишлаган Олег Яровинский у ҳақида қуйидаги сўзларни айтганди:
«Мартин майдонда ҳамма нарса қила олади – тезкор, техник жиҳатдан яхши кўникмаларга эга ва катта ҳажмдаги ишларни бажара олади. Заиф томонларсиз ва ўйинни тушунадиган замонавий футболчининг ажойиб намунаси. Шу билан бирга у нафақат тоза тўпларда ўйнайди, балки кураш ҳам олиб боради».
Таърифларга қараганда, Эдегор етук футболчи ва ўйин сифати жиҳатидан АПЛга мослашиши керак, аммо нега унда «Реал»да ўз ўрнига эга бўлмади? «Витесс»нинг ўша пайтдаги бош мураббийи Леонид Слуцкий бу саволга шундай жавоб берди:
«Ҳамма унинг тўпни олиб, ўн кишини алдаб ўтишини ва гол уришини кутмоқда. Унинг фаолиятидаги ҳар бир кун шундай умидлар билан ўтмоқда. Мен у дунёнинг энг истеъдодли ўсмири деб тан олингандан бери уни таъқиб қилган руҳий юкни ундан олиб ташладим».
«Слуцкий менга эркинлик ва ўзимга бўлган ишончни бағишлади», – дея тасдиқлайди футболчининг ўзи ҳам юқоридаги гапларни.
Норвегиялик футболчига Мадридда эркинлик бериш керак эди. «Реал»га келган ҳар бир футболчига улкан босим оситида қолиши табиий. Ҳатто бу босимга Эден Азар даражасидаги супер юлдузлар ҳам дош беролмаслиги мумкин. Премьер Лигада 9-ўринни эгаллаб турган «Арсенал» эса ёш йигит учун ўзини кўрсатишга зўр маскан бўлиб кўринмоқда. Ҳозир ҳам клуб, ҳам футболчи бир-бирига муҳтож.
Афтидан, Мадриддагилар бошиданоқ бу йигитга ишонмаган. Эдегор Карло Анчелотти даврида «қироллик клуби»да пайдо бўлганди, мутахассис ўзининг «Сокин етакчилик» китобида ушбу трансферни кўпроқ PR (пиар) ҳаракат деб атаганди. «Флорентино Перес норвегиялик футболчини сотиб олса, сиз шунчаки буни қабул қилишингиз керак», – деб ёзган Анчелотти. Бироқ Гвардиоланинг Эдегорни дунёнинг энг яхши футболчисига айлантирмоқчи бўлгани ҳақида ҳам маълумотлар учраган.
Эдегорнинг савияси «Арсенал»га тўғри келади. Савол шуки, клуб бир неча ойга келган футболчига қанчалик даражада ишонишга тайёр?!
Изоҳ (0)