Ispaniyaning El Mundo nashri “Barselona” va jamoa hujumchisi Lionel Messi o‘rtasidagi shartnoma nusxasini qo‘lga kiritganini ma’lum qildi. Bu haqda ESPN va dunyoning boshqa ko‘plab OAVda e’lon qilindi.
E’lon qilingan ma’lumotlar shuni ko‘rsatdiki, argentinalik futbolchining shartnomasi sport tarixidagi eng yirik bitim hisoblanadi. Shartnoma 2017-yilning noyabrida tuzilgan bo‘lib, 2021-yilning 30-iyuniga qadar mo‘ljallangan.
Manbaga ko‘ra, Messi ushbu kelishuvdan jami 555 237 619 yevro ishlab oladi. Shu vaqtga qadar Lionel 511 540 545 yevroga ega bo‘lgan.
“Barselona” 30 betlik shartnomada hujumchiga mavsumiga bonuslarni hisobga olgan holda 138 million yevro to‘lash majburiyatini olgan. Shuningdek, unda shartnoma imzolaganlik uchun 115 225 000 yevro va sodiqlik uchun 77 929 955 yevro bonus qayd etilgan.
Eslatib o‘tamiz, Messi joriy mavsum yakunida o‘z poyoniga yetadigan shartnomani hali uzaytirgani yo‘q. Avvalroq u “Barselona” prezidentligi saylovlaridan keyin bir qarorga kelishi aytilgandi.
El Mundo gazetasining bosh muqovasi mana shunday ko‘rinish oldi:
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)