Испаниянинг El Mundo нашри «Барселона» ва жамоа ҳужумчиси Лионель Месси ўртасидаги шартнома нусхасини қўлга киритганини маълум қилди. Бу ҳақда ESPN ва дунёнинг бошқа кўплаб ОАВда эълон қилинди.
Эълон қилинган маълумотлар шуни кўрсатдики, аргентиналик футболчининг шартномаси спорт тарихидаги энг йирик битим ҳисобланади. Шартнома 2017 йилнинг ноябрида тузилган бўлиб, 2021 йилнинг 30 июнига қадар мўлжалланган.
Манбага кўра, Месси ушбу келишувдан жами 555 237 619 евро ишлаб олади. Шу вақтга қадар Лионель 511 540 545 еврога эга бўлган.
«Барселона» 30 бетлик шартномада ҳужумчига мавсумига бонусларни ҳисобга олган ҳолда 138 миллион евро тўлаш мажбуриятини олган. Шунингдек, унда шартнома имзолаганлик учун 115 225 000 евро ва содиқлик учун 77 929 955 евро бонус қайд этилган.
Эслатиб ўтамиз, Месси жорий мавсум якунида ўз поёнига етадиган шартномани ҳали узайтиргани йўқ. Аввалроқ у «Барселона» президентлиги сайловларидан кейин бир қарорга келиши айтилганди.
El Mundo газетасининг бош муқоваси мана шундай кўриниш олди:
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)