Yevropa futbol jamoatchiligining bor e’tibori “Liverpul”ning APLda 2017-yilning aprelidan beri ilk marta o‘z maydonida mag‘lub bo‘lganiga (Angliya chempionati 18-turidan o‘rin olgan “Byornli”ga qarshi o‘yin 0:1) qaratilganida, Ispaniya La Ligasida Diyego Simeone boshchiligida madridliklar matonat va xarakter ko‘rsatib, “Eybar”dan ustun keldi. Shu tariqa “Atletiko” chempionatdagi yetakchiligini yanada mustahkamlab oldi.
Xo‘sh, “Atletiko”ning 20/21-yildagi o‘ziga xos xususiyati nimada?
Birinchidan, albatta, bu Luis Suaresni sotib olish bilan bog‘liqdir. Simeonega o‘z futbol falsafasi bo‘yicha aynan Suares kabi, deyarli barcha vaziyatlarda raqibni ayamaydigan va ularning hammasidan foydalana oladigan hujumchi yetishmayotgandi.
Ungacha “matraschilar” safida markaziy hujumchi pozitsiyasida o‘ynagan Diyego Kosta va Alvaro Morata urugvaylikdan daraja jihatidan ancha pastda edi. Natijada, Luis har ikkalasini jimgina tarkibdan chiqarib yubordi (biri “Yuve”ga ijaraga berildi, ikkinchisi bilan shartnoma bekor qilindi) va ushbu mavsumda “Atletiko”ning eng yaxshi to‘purariga aylandi. Uning hisobida (La Ligada) 15 ta o‘yin 12 ta gol bor.
Aynan Suares yuqorida qayd etilgan “Eybar”ga qarshi qiyin kechgan o‘yinda g‘alaba dublining muallifiga aylandi. To‘g‘ri, u hali Chempionlar Ligasida gol ura olgani yo‘q, ammo bu faqat vaqt masalasidir.
Jamoa muvaffaqiyatlaridagi keyingi muhim omil Markos Lyorentening maydondagi pozitsiyasi o‘zgarishi bo‘ldi. Diyego Simeone ushbu mavsumda uni hujum chizig‘iga yaqinlashtirdi. Sobiq tayanch yarim himoyachisi hozir forvard yoki hujumkor yarim himoyachi rolini bajarmoqda, faqatgina vaqti-vaqti bilan maydon markazidagi yoki o‘ng qanotdagi muammoli joylarda yordamlashmoqda, xolos. Ushbu o‘zgarishlar esa futbolchining foydali ish koeffitsiyenti, samaradorligining keskin o‘sishi va, albatta, transfer narxida o‘z aksini topmay qolmadi.
Endilikda 25 yoshli ispaniyalik Suaresni to‘p bilan ta’minlashdan tashqari tez-tez o‘zi ham gol urishni kanda qilmayapti. Taqqoslash uchun Lyorente 2019/20-yilgi mavsumda 36 o‘yin o‘tkazib, 5 ta gol va 5 assistni amalga oshirgandi. 20/21-yilda esa u 23 o‘yinda 7 ta gol va 5 golli uzatmani amalga oshirishga ulgurdi.
Shuningdek, Kiran Trippyer ham Ispaniyaga to‘laligicha moslashib oldi. Premyer Ligadan kelgan futbolchi agar o‘tgan mavsumni moslashishga sarflangan bo‘lsa, 20/21-yilgi mavsumda u sezilarli darajada yaxshi harakat qilmoqda. Jamoani Gabi tark etganidan so‘ng esa angliyalik futbolchida standartlarni bajarish borasida o‘ng oyoqli raqobatchi qolmadi hisob, shu sababli Kiran golli uzatmalar soni bo‘yicha o‘tgan yilgi chempionatdagi ko‘rsatkichini yangilashga ham ulgurdi:
19/20-yilgi mavsum – 25 ta o‘yin, 4 ta golli uzatma,
20/21-yilgi mavsum – 14 o‘yin, 5 ta assist.
Simeonening standartlarga bo‘lgan alohida yondashuvi va ikkinchi qavatda o‘ynay oladigan yuqori toifadagi futbolchilar borligini hisobga olib, ko‘rsatkich aniq o‘sishda davom etadi. Trippyer mavsumning birinchi yarmida eng yuqori o‘rtacha ko‘rsatkichga ega bo‘lgandi. Hatto u bu borada yuqorida aytib o‘tilgan hujumchilarni ham ortda qoldirdi. Ammo yaqinda ingliz futbolchisi sport o‘yinlariga pul tikishda ayblandi. Shu tariqa uning barcha harakatlari bekor ketdi va bu o‘z navbatida “Atletiko”ning muvaffaqiyatlariga ham xavf soldi.
Angliya futbol assotsiatsiyasi futbolchini 10 haftaga diskvalifikatsiya qildi va bu cheklov 2020-yilning 23- dekabridan barcha musobaqalarda kuchga kirdi. Shu sababli Trippyer allaqachon 4 ta liga o‘yinini ham o‘tkazib yubordi. Ammo shu yil boshida FIFA “Atletiko”ning apellyatsiyasidan so‘ng futbolchining 10 haftalik diskvalifikatsiyasini rasman to‘xtatib qo‘ydi. Hozirda jazoning unchalik og‘ir bo‘lmasligiga umid qilinmoqda.
Joa Feliks. O‘tgan mavsumda o‘ziga sarflangan mablag‘lar uchun mas’uliyat yukini his qilgan holda kutilgan o‘yinni namoyish eta olmagan portugaliyalik asta-sekin nimalarga qodir ekanini isbotlashni boshladi va ba’zida o‘yin taqdirini hal qilishda asosiy rollarni bajarmoqda. Nima bo‘lganda ham 21 yoshli iqtidor egasi Simeone jamoasi natijasiga tobora ko‘proq ta’sir o‘tkazmoqda.
19/20-yilgi mavsum – 36 o‘yin, 9 ta gol, 3 ta assist
20/21-yilgi mavsum – 23 o‘yin, 8 gol ta 4 golli pas.
“Atletiko” muvaffaqiyatidagi yana bir muhim omil, bu Yannik Ferreyra Karraskoning qaytishi bo‘ldi. Belgiyalik Xitoyga pul ishlash uchun ketgach ham yana Yevropaga qaytib, u yerda yuqori darajada o‘ynash mumkinligiga yaqqol misoldir. Bir yil davomida “Atletiko”da ijarada o‘ynagan belgiyalik barqaror o‘yin ko‘rsatdi va hali ham Yevropaning eng yaxshi futbolchilari bilan raqobatlasha olishini isbotladi. Shu tariqa Yannik “matraschilar” rahbariyatini 2020-yilning yozida to‘laqonli shartnoma imzolashga ishontira oldi. Hozir Karrasko o‘ziga bildirilgan ishonchni to‘laligicha oqlamoqda va chempionat o‘yinlarida uch bor eng yaxshi o‘yinchi deb topildi.
19/20-yilgi mavsum – 16 o‘yin, 1 ta gol, 4 ta assist
20/21-yilgi mavsum – 18 o‘yin, 3 ta gol, 5 ta assist
Va, albatta, asosiy omil bu jamoaning himoya chizig‘i va darvozabonidir. “Atletiko” “quruq” o‘yinlar soni bo‘yicha yetakchilik qilmoqda, Simeone shogirdlari Ispaniya chempionatning 17 uchrashuvida atigi 7 ta gol o‘tkazib yuborgan, bu kuchli beshlik chempionatlari orasidagi eng yaxshi natijadir. Aslini olganda, “matraschilar” himoyasi doimo ishonchli o‘yinlari bilan mashhur bo‘lib kelgan, ammo joriy mavsumda ular har qachongidan ham ishonchli o‘yin ko‘rsatmoqda. Mario Ermosoning o‘yindan o‘yinga o‘sib borayotgani, Stefan Savich, Felipe va Xose Mariya Ximenesning ishonchli va barqaror o‘yinlari aksariyat hujumlarni zararsizlantirish kafolatini bermoqda. Darvozada Yan Oblak kabi o‘sishdan va mahoratini oshirishdan to‘xtamaydigan posbon bo‘lishi esa jamoaning Yevropada eng kam gol o‘tkazib yuborishini ta’minlaydi.
“Atletiko”ning himoyasi:
19/20-yilgi mavsum – 38 o‘yin, 17 ta “quruq” o‘yin
20/21-yilgi mavsum – 17 o‘yin, 11 ta “quruq”
Ushbu “Atletiko”da barcha narsa mujassam. Mehnatsevarlik, xarakter, ishtiyoq, mahorat va zamonaviy futbolda kamdan kam uchraydigan futbolga bo‘lgan muhabbat. Klubdagi bu mukammal muvozanat qancha davom etishini hech kim bilmaydi, shuning uchun vaqtingizni behuda sarflamang va “Atletiko”ning o‘yinlarini tomosha qilib qoling.
Izoh (0)