AQShdagi sport klublari o‘yinlarda COVID-19 yuqtirgan tomoshabinlarni aniqlash uchun xizmat itlaridan foydalanishga bosqichma-bosqich tayyorlanmoqda, deb xabar berdi “Interfaks”.
Xususan, “Mayami Hit” basketbol klubi bu borada ilk qadamlarni qo‘ygan. Keyingi haftada ushbu klub uy uchrashuvlarini tomosha qilish uchun tomoshabinlarni taklif qilmoqda. So‘nggi oylarda basketbolchilar koronavirus pandemiyasi sababli tomoshabinlarsiz o‘yin o‘tkazishgan.
Mayami jamoasi veb-saytida ta’kidlanishicha, bundan buyon kiraverishdagi barcha tomoshabinlar o‘zlarini qanday his qilayotgani haqidagi savollarga javob berishlari kerak. Keyin ular maxsus o‘rgatilgan itlarning yonidan o‘tishi kerak bo‘ladi. Agar it COVID-19 infeksiyasi borligini sezsa, u tomoshabin oldida o‘tirib oladi.
Bundan tashqari, klub o‘yin davomida o‘zini yaxshi his qilmagan tomoshabinlar uchun maxsus xonalar tayyorlagan.
AQShdagi sport ishqibozlari endi boshqa klublardan ham shunday choralar ko‘rilishini kutmoqda. Ammo The Guardian ta’kidlaganidek, mamlakat koronavirusni aniqlash qobiliyatiga ega bo‘lgan qo‘riqchi itlarni qancha vaqt ichida tayyorlay olishi aniq emas.
Xususan, ko‘pchilikni Super Bowl – 2021-yil 7-fevralda Milliy futbol ligasi (NFL) finaliga shunday itlarni tayyorlash mumkinmi, degan savol qiziqtiradi. Ushbu amerikancha futbol uchrashuvi Qo‘shma Shtatlarda yilning eng yirik sport tadbirlaridan biri hisoblanadi. Bu yil Florida shtatidagi stadionda atigi 22 ming tomoshabin bo‘lishi rejalashtirilgan, ularning 7,5 ming nafari koronavirusga qarshi emlangan shifokorlardir. Uchrashuv bo‘lib o‘tadigan Raymond Jeyms stadioni yana ko‘plab tomoshabinlarni qabul qiladi, ammo koronavirus tufayli tashkilotchilar ularning sonini keskin cheklashga qaror qildi.
Xizmat itlaridan COVID-19 uchun “detektor” sifatida foydalanish so‘nggi oylarda Yevropada faol o‘rganilmoqda.
Italiya politsiyasi COVID-19 yuqtirishi mumkin bo‘lgan odamlarni aniqlash uchun itni o‘rgatishga olti-sakkiz hafta vaqt kerakligini ma’lum qildi. Ushbu usulning afzalliklaridan biri shundaki, it hech qanday alomatlari bo‘lmasa ham, bemorni tezda aniqlay oladi.
Avvalroq Finlyandiya aeroportida itlar koronavirusni PZR-testlardan ko‘ra tezroq aniqlayotgani hamda Dubay aeroportida ham COVID-19’ni aniqlash uchun harbiy xizmat itlaridan foydalanayotgani to‘g‘risida xabar berilgandi.
Izoh (0)