Bosh vazir o‘rinbosari Aziz Abduhakimov shaxmat federatsiyasiga rais bo‘ldi. Avvalroq u federatsiyada o‘zgarishlar bo‘lishini aytgandi

Bosh vazir o‘rinbosari, Turizmni rivojlantirish qo‘mitasi, shuningdek, badminton federatsiyasi raisi Aziz Abduhakimov O‘zbekiston shaxmat federatsiyasi raisi etib saylandi.

Shaxmat federatsiyasidan “Daryo”ga ma’lum qilinishicha, 30-yanvar, shanba kuni tashkilotda navbatdan tashqari hisobot-saylov konferensiyasi tashkil etilgan. Unda shaxmat federatsiyasiga yangi rais saylash masalasi ko‘tarilgan va Aziz Abduhakimov nomzodi ko‘rsatilgan. Ovoz berish yo‘li bilan Abduhakimov shaxmat federatsiyasining yangi rais etib saylangan.

Qayd etish joiz, hozirga qadar ushbu lavozimda Dmitriy Li ishlab kelayotgan edi. U bir vaqtning o‘zida prezident huzuridagi Loyiha boshqaruvi milliy agentligi direktori vazifasini ham bajarib kelardi.

Avvalroq O‘zbekistonning bir qator taniqli grossmeysterlari va shaxmat federatsiyasi o‘rtasida muammolar borligi xabar qilingandi.

Jumladan, grossmeyster Gulruhbegim Tohirjonova AQSh nomidan dona surishi, Nafisa Mo‘minova va Xulkar Tohirjonovalarning terma jamoadan chetlatilgani haqida xabarlar katta rezonans keltirib chiqargandi.

Opa-singil shaxmatchilarning otasi Alisher Mo‘minov Gulruhbegimning AQSh nomidan dona surayotganiga “O‘zimizning federatsiyaga kerak bo‘lmasa, biz nima qila olamiz?” deya munosabat bildirdi.

Shaxmat federatsiyaga esa “O‘zi chiqargan qaror uchun boshqalarni yomonotliq qilishga haqqi yo‘q” deya Mo‘minovlar oilasiga javob qaytardi.

Shundan so‘ng sport vazirining birinchi o‘rinbosari Ravshan Ermatov ushbu masala vazirlik miqyosida muhokama qilinyotganini aytdi. Biroz o‘tib Aziz Abduhakimov shaxmat federatsiyasi faoliyati chuqur o‘rganilyotgani va tegishli o‘zgarishlar bo‘lishini ma’lum qildi.

Orada O‘zbekiston shaxmati tarixidagi eng yosh xalqaro grossmeyster Javohir Sindorov “Daryo”ga shaxmat federatsiyasining tushunarsiz taqiqlari va e’tiborsizliklari haqida intervyu berdi. Federatsiya esa bunga javoban tashkilot “oltin baliqcha” emasligini eslatdi.

Eslatib o‘tamiz, 2021-yil 14-yanvar kuni “Shaxmatni yanada rivojlantirish va ommaviylashtirish hamda shaxmatchilarni tayyorlash tizimini takomillashtirish chora-tadbirlari to‘g‘risida”gi prezident qarori e’lon qilindi.

Unga ko‘ra O‘zbekistondagi barcha maktablarda “Shaxmat sinflari” ochilishi, 150 ta ixtisoslashtirilgan shaxmat maktabi tashkil etilishi belgilandi.