Бош вазир ўринбосари, Туризмни ривожлантириш қўмитаси, шунингдек, бадминтон федерацияси раиси Азиз Абдуҳакимов Ўзбекистон шахмат федерацияси раиси этиб сайланди.
Шахмат федерациясидан «Дарё»га маълум қилинишича, 30 январь, шанба куни ташкилотда навбатдан ташқари ҳисобот-сайлов конференцияси ташкил этилган. Унда шахмат федерациясига янги раис сайлаш масаласи кўтарилган ва Азиз Абдуҳакимов номзоди кўрсатилган. Овоз бериш йўли билан Абдуҳакимов шахмат федерациясининг янги раис этиб сайланган.
Қайд этиш жоиз, ҳозирга қадар ушбу лавозимда Дмитрий Ли ишлаб келаётган эди. У бир вақтнинг ўзида президент ҳузуридаги Лойиҳа бошқаруви миллий агентлиги директори вазифасини ҳам бажариб келарди.
Аввалроқ Ўзбекистоннинг бир қатор таниқли гроссмейстерлари ва шахмат федерацияси ўртасида муаммолар борлиги хабар қилинганди.
Жумладан, гроссмейстер Гулруҳбегим Тоҳиржонова АҚШ номидан дона суриши, Нафиса Мўминова ва Хулкар Тоҳиржоноваларнинг терма жамоадан четлатилгани ҳақида хабарлар катта резонанс келтириб чиқарганди.
Опа-сингил шахматчиларнинг отаси Алишер Мўминов Гулруҳбегимнинг АҚШ номидан дона сураётганига «Ўзимизнинг федерацияга керак бўлмаса, биз нима қила оламиз?» дея муносабат билдирди.
Шахмат федерацияга эса «Ўзи чиқарган қарор учун бошқаларни ёмонотлиқ қилишга ҳаққи йўқ» дея Мўминовлар оиласига жавоб қайтарди.
Шундан сўнг спорт вазирининг биринчи ўринбосари Равшан Эрматов ушбу масала вазирлик миқёсида муҳокама қилинётганини айтди. Бироз ўтиб Азиз Абдуҳакимов шахмат федерацияси фаолияти чуқур ўрганилётгани ва тегишли ўзгаришлар бўлишини маълум қилди.
Орада Ўзбекистон шахмати тарихидаги энг ёш халқаро гроссмейстер Жавоҳир Синдоров «Дарё»га шахмат федерациясининг тушунарсиз тақиқлари ва эътиборсизликлари ҳақида интервью берди. Федерация эса бунга жавобан ташкилот «олтин балиқча» эмаслигини эслатди.
Эслатиб ўтамиз, 2021 йил 14 январь куни «Шахматни янада ривожлантириш ва оммавийлаштириш ҳамда шахматчиларни тайёрлаш тизимини такомиллаштириш чора-тадбирлари тўғрисида»ги президент қарори эълон қилинди.
Унга кўра Ўзбекистондаги барча мактабларда «Шахмат синфлари» очилиши, 150 та ихтисослаштирилган шахмат мактаби ташкил этилиши белгиланди.
Мавзуга доир:
- АҚШ шахмат федерацияси вакилига айланган Гулруҳбегим Тоҳиржонованинг отаси: «Ўзимизнинг федерацияга керак бўлмаса, биз нима қила оламиз?»
- Азиза Умарова АҚШга йўл олган гроссмейстер Гулруҳбегим Тоҳиржонова ҳақида: «Энди унга ҳеч қандай федерация тўсқинлик қилолмайди»
- «Ўзи чиқарган қарор учун бошқаларни ёмонотлиқ қилишга ҳаққи йўқ». Шахмат федерацияси Гулруҳбегим Тоҳиржонова атрофидаги хабарларга муносабат билдирди
- «Шахмат федерацияси устимиздан мағзава ағдарди». Нафиса Мўминова ва Хулкар Тоҳиржонова федерациянинг раддиясига муносабат билдирди
- «Агар шу кетишда давом этса мен ҳам шахмат федерациямни ўзгартираман». Ўзбекистон тарихидаги энг ёш гроссмейстер Жавоҳир Синдоров тушунарсиз тақиқлар ва федерациянинг эътиборсизлиги ҳақида (видео)
- «Шахмат федерациясининг яна сувдан қуруқ чиқишга ҳаракат қилгани афсусланарли ҳол». Жавоҳир Синдоров федерациясининг баёнотига муносабат билдирди
Изоҳ (0)