Shvetsiyaning Gotland shahrida harakatlanayotgan elektrokarlarni quvvatlantirishga qodir innovatsion yo‘lning birinchi bosqich sinovlari yakunlandi. Yo‘lning 1,65 kilometrli qismi bo‘ylab elektr energiyasida harakatlanuvchi mashina yurib o‘tgan bo‘lib, test doirasida u muvaffaqiyatli quvvatlangan — yo‘l qor bilan qoplanganiga qaramay, u 70 kilovattga yaqin energiya to‘plagan, deb yozadi Motor.
Mazkur yo‘lni yaratish va qurish bilan Isroilning ElectReon kompaniyasi shug‘ullangan. Quvvatlanish quyidagi tartibda amalga oshadi: asfalt ostiga yo‘l chetidagi boshqaruv bloklariga ulana oladigan mis g‘altaklar o‘rnatilgan, yo‘l bo‘ylab harakatlangan elektrokarlar esa simsiz energiya uzatish moslamalari bilan jihozlangan. ElectReon’ning aniqlik kiritishicha, avtomobil ishlab chiqaruvchilar hozircha bu kabi qurilmalarni seriyali elektromobillarga o‘rnatmayapti, biroq uni mavjud modellarga oson va arzon narxda o‘rnatish mumkin.
ElectReon’ning quvvatlantirish funksiyasiga ega yo‘li nafaqat Shvetsiyada, balki Isroilda ham bor. Sinov kompleksi Tel-Avivda qurilgan bo‘lib, tez orada u yerda bir vaqtning o‘zida bir nechta elektromobil ishtirokida sinovlar boshlanadi. Isroil hukumati avvalroq ichki yonuv dvigateliga ega avtomobillardan 2030-yilga borib butunlay voz kechishini ma’lum qilgandi.
Izoh (0)