Швециянинг Готланд шаҳрида ҳаракатланаётган электрокарларни қувватлантиришга қодир инновацион йўлнинг биринчи босқич синовлари якунланди. Йўлнинг 1,65 километрли қисми бўйлаб электр энергиясида ҳаракатланувчи машина юриб ўтган бўлиб, тест доирасида у муваффақиятли қувватланган — йўл қор билан қопланганига қарамай, у 70 киловаттга яқин энергия тўплаган, деб ёзади Motor.
Мазкур йўлни яратиш ва қуриш билан Исроилнинг ElectReon компанияси шуғулланган. Қувватланиш қуйидаги тартибда амалга ошади: асфальт остига йўл четидаги бошқарув блокларига улана оладиган мис ғалтаклар ўрнатилган, йўл бўйлаб ҳаракатланган электрокарлар эса симсиз энергия узатиш мосламалари билан жиҳозланган. ElectReon’нинг аниқлик киритишича, автомобиль ишлаб чиқарувчилар ҳозирча бу каби қурилмаларни серияли электромобилларга ўрнатмаяпти, бироқ уни мавжуд моделларга осон ва арзон нархда ўрнатиш мумкин.
ElectReon’нинг қувватлантириш функциясига эга йўли нафақат Швецияда, балки Исроилда ҳам бор. Синов комплекси Тель-Авивда қурилган бўлиб, тез орада у ерда бир вақтнинг ўзида бир нечта электромобил иштирокида синовлар бошланади. Исроил ҳукумати аввалроқ ички ёнув двигателига эга автомобиллардан 2030 йилга бориб бутунлай воз кечишини маълум қилганди.
Изоҳ (0)