Қозоғистоннинг коррупцияга қарши курашиш агентлиги раиси Алик Шпекбаев амалдорларга кичик ва ўрта даражадаги коррупцион жиноятлари учун жазо сифатида жамоат ишларига тайинлашни таклиф қилмоқда, деб хабар берди «Интерфакс».
«Иқтисодий ҳамкорлик ва тараққиёт ташкилотидаги бир қатор мамлакатларда жамоат ишлари коррупцияга оид жиноятлар учун асосий ёки қўшимча жазо сифатида самарали қўлланилмоқда. Хусусан, Буюк Британияда маҳкумларга ‘жамият ҳақини қайтариш’ ёзувли ёрқин рангдаги нимчалар кийдириш ва уларни кўча ишларига мажбурлаш одат тусига кирган», — деди Шпекбаев.
Унинг сўзларига кўра, ушбу турдаги жазо психологик жиҳатдан анча самарали бўлиб, жамият ўз «қаҳрамонларини» таниб олади.
«Кичик ва ўрта оғирликдаги коррупция жиноятлари учун жамоат ишларига жалб қилишнинг Жиноят қонунчилиги билан тартибга солинган бўлишига қарамай, Қозоғистонда мазкур жазо тури суд томонидан амалда қўлланилмайди. Менинг фикримча, бу институтни биринчи навбатда, энг кучли профилактик таъсир нуқтаи назаридан фаоллаштириш керак», — дея хулоса қилди агентлик раиси.
Аввалроқ Қозоғистон ўлим жазосидан расман воз кечгани, мамлакатда пора учун маҳкум қилинганларни муддатидан илгари озод қилиш тақиқлангани ҳақида хабар берилганди.
Изоҳ (0)