Birinchi marta Buyuk Britaniyada qayd qilingan koronavirusning yangi shtammi Yevropaning 33 ta mamlakatida aniqlangan. Bu haqda Jahon sog‘liqni saqlash tashkilotining (JSST) Yevropa mintaqaviy byurosi direktori Hans Klyuge Kopengagendagi brifingda ma’lum qildi, deya xabar bermoqda “Izvestiya”.
Shuningdek, kasallikning “afrikacha” varianti 16 ta Yevropa mamlakatida aniqlangan.
Klyugening ta’kidlashicha, so‘nggi ikki hafta ichida 30 mamlakatda yangi holatlarning o‘sishida sezilarli pasayish kuzatildi. Bu ko‘rsatkich 2 hafta oldin 23 mamlakatni tashkil qilgan edi. Ammo tarqalish darajasi hali ham juda yuqori bo‘lib turibdi.
Shu munosabat bilan, Klyuge Yevropa davlatlaridan mavjud xatarlar fonida cheklovlarni barvaqt bekor qilmaslikni so‘radi. Jahon sog‘liqni saqlash tashkilotining Yevropa bo‘yicha byurosi direktorining fikricha, eng yaxshi variant – tashkilot tomonidan belgilangan epidemiologik mezonlarga asoslanib cheklovlarni bosqichma-bosqich olib tashlash.
Avvalroq O‘zbekistonlik olimlar koronavirusning “britancha” shtammini aniqlovchi test tizimi ustida ish olib borayotgani, Buyuk Britaniya koronavirus oqibatida vafot etganlar soni 100 mingdan oshgan Yevropadagi birinchi davlat bo‘lgani hamda Germaniyada koronavirusga qarshi emlanishni istamagan xodimlarning ishdan bo‘shatilishi bo‘yicha birinchi holat qayd etilgani haqida xabar berilgandi.
Izoh (0)