O‘zbekistonda endilikda mahalla raisi, profilaktika inspektori, maktab direktori, yoshlar yetakchisi yoshlar muammolarini “fuqarobay” tizimida aniqlab, sektor rahbarlari oldiga aniq va lo‘nda masalalarni qo‘yadi. Bu haqda 27-yanvarda Prezident Shavkat Mirziyoyev raisligida o‘tkazilgan videoselektor yig‘ilishida so‘z yurtilidi, deya xabar bermoqda “Daryo” muxbiri.
Davlat rahbarining ta’kidlashicha, tuman sektor rahbarlari haftaning ikki kunini faqat yoshlar muammolarini hal etishga ajratadi. Bir kun yoshlar bandligi bilan, ikkinchi kun ularning bo‘sh vaqtini mazmunli tashkil etish bilan shug‘ullanadi.
“Sektor rahbarlari aniqlangan muammolarning yechimi bo‘yicha dasturlar ishlab chiqib, mahalliy kengashlarga kiritadi, ijrosi bo‘yicha har oyda xalq vakillariga hisobot berib boradi.
Har bir tuman va shahar hokimining 6 ta o‘rinbosari, joylardagi tashkilot rahbarlari o‘z faoliyatini quyidagi ustuvor vazifalar asosida tashkil qilishi shart: hokimning iqtisodiyot, investitsiyalar va qishloq xo‘jaligi bo‘yicha o‘rinbosarlari – bandlik masalalari bilan shug‘ullanadi; soliq idorasi, savdo-sanoat palatasi va tijorat banklari rahbarlari – yoshlarni tadbirkorlikka jalb qilishga; hokimning yoshlar masalalari bo‘yicha o‘rinbosari – yoshlarning bo‘sh vaqtini mazmunli tashkil etishga; tuman prokurori, ichki ishlar va mudofaa bo‘limi boshliqlari – uyushmagan yoshlar bilan ishlash, jinoyatchilikni jilovlash, ularda vatanparvarlik tuyg‘ularini shakllantirishga mas’ul bo‘ladi”, – dedi Prezident.
Avvalroq Shavkat Mirziyoyev O‘zbekistondagi 18-30 yoshlilar orasidagi rasmiy ishsizlar sonini ma’lum qilgani, bosh vazir va administratsiya rahbaridan ruxsat so‘ramay majlis o‘tkazgan amaldor ishdan olinishini ta’kidlagani hamda 3 nafar yoshni ish bilan ta’minlashga va’da berib, uni bajarmagan Kogon shahar prokurorini ishdan olish bo‘yicha topshiriq bergani haqida xabar berilgandi.
Izoh (0)