Tramp impichmenti haqidagi rezolyutsiya AQSh Senatiga kiritildi, Bayden jarayon muvaffaqiyatli yakunlanishiga shubha bildirdi

AQSh Kongressining Vakillar palatasi mamlakat sobiq prezidenti Donald Trampning impichmenti haqidagi rezolyutsiyani Senatga kiritdi, deb yozadi “RBK”.

Vakillar qora niqob taqqan holda hujjatni Kapitoli bo‘ylab olib o‘tib, Senat yig‘ilish o‘tkazadigan qanotga yetkazdi.

House managers formally deliver to the Senate the article of impeachment against former President Donald Trump https://t.co/glDz9zos4C pic.twitter.com/cO5795evsb

— CNN Politics (@CNNPolitics) January 26, 2021

AQSh prezidenti Jo Bayden Donald Trampga nisbatan impichment jarayoni bo‘lib o‘tishi kerak, deb hisoblaydi, ammo uning muvaffaqiyatli bo‘lishiga shubha qiladi.

“Men bu (impichment jarayoni) bo‘lishi kerak, degan fikrdaman”, — dedi u.

Shu bilan birga, prezident bu uning va ma’muriyatiga nomzodlarning kun tartibiga ta’sir o‘tkazishi mumkinligini e’tirof etdi, biroq “bu amalga oshmasa, ta’sir yomonroq bo‘lishi”ni ma’lum qildi.

Baydenning fikricha, Senatda impichment tarafdorlari sobiq prezidentni isyonga gijgijlashda aybdor deb topish uchun yetarlicha ovoz to‘plamaydi. Buning uchun rezolyutsiyani 100 senatordan 67 nafari, ya’ni uchdan ikki qismi qo‘llab-quvvatlashi kerak. Senatning joriy tarkibini hisobga olganda, demokratlar respublikachilarning 17 ta ovozini qo‘lga kiritishi kerak bo‘ladi.

Trampning impichmenti bo‘yicha jarayon Senatda 8-fevraldan keyin boshlanadi, deya ma’lum qilgan edi Kongress yuqori palatasidagi demokratlar yetakchisi Chak Shumer. Vakillar palatasi Senatga rezolyutsiyani 25-yanvar kuni kiritishi kerak edi. Amerika sobiq yetakchisi qo‘zg‘olonga da’vat qilganlikda ayblanmoqda.

Eslatib o‘tamiz, AQSh Vakillar palatasi 13-yanvar kuni Trampga impichment e’lon qilgandi. Uni hokimiyatdan chetlatish to‘g‘risidagi rezolyutsiya kongressmenlarning 232 nafari, shu jumladan 10 nafar respublikachi ham ovoz bergan. Yana 197 kishi Trampning chetlatilishiga qarshi chiqdi.

Bu AQSh tarixida birinchi marta prezidentga ikki marta impichment e’lon qilinishi. Vakillar Palatasi Trampga 2019-yil dekabrida impichment e’lon qilgandi. Ammo unga qarshi ayblovlarni Senatda ko‘rib chiqishning navbatdagi bosqichida u oqlangan.