Niderlandiya bosh vaziri Mark Ryutte mamlakatda o‘tgan hafta oxiri yuz bergan tartibsizliklarni qoraladi, deb yozadi “Interfaks” The Guardian’ga tayanib.
“Buning qonuniy noroziliklarga hech qanday aloqasi yo‘q. Bu jinoiy zo‘ravonlik”, — degan Ryutte. Uning ta’kidlashicha, tartibsizliklar tungi komendant soati zarurligini ko‘rsatmoqda.
Eslatib o‘tamiz, 23-yanvardan Niderlandiyada butun mamlakat bo‘ylab 21:00 dan 04:30 gacha amal qiladigan komendantlik soati kuchga kirdi, u 10-fevralgacha davom etishi belgilangandi. Mamlakatning bir qator shaharlarida, xususan, Amsterdam va Eyndxoven shaharlarida koronavirus pandemiyasi tufayli cheklovlarga qarshi norozilik namoyishlari bo‘lib o‘tdi.
Niderlandiya politsiyasi ushbu shaharlardagi namoyishchilarni tarqatish uchun maxsus vositalardan foydalandi.
Politsiya suv zambaraklari, dubinkalarni qo‘lladi, Eyndxovenda esa ko‘zni yoshlantiruvchi gazdan ham foydalanishdi. Ikkala shahardagi namoyishchilar o‘z navbatida huquq-tartibot organlari xodimlariga feyerverklar yog‘dirdi, Eyndxovenda esa odamlar kuch vakillari yo‘lini velosipedlardan iborat barrikadalar bilan to‘sishga urindi.
Amsterdamda, politsiya ma’lumotlariga ko‘ra, 1,5 ming kishi mitingga chiqdi, ularning 100 dan ortig‘i hibsga olindi.
Izoh (0)