25 январь куни Олий Мажлис Қонунчилик палатасининг Евросиё иқтисодий иттифоқи билан ҳамкорлик масаласини ўрганишни ташкил этиш бўйича ишчи гуруҳ йиғилиши бўлиб ўтди. Бу ҳақда парламент матбуот хизмати хабар берди.
Ишчи гуруҳнинг асосий мақсади ЕОИИга аъзоликнинг ижобий ва салбий жиҳатларини чуқур таҳлил қилиш, бошқа халқаро ташкилотлар ва давлатлар билан алоқаларга таъсирини ўрганиб чиқишдан иборат бўлиб, ишчи гуруҳга раҳбар сифатида Қонунчилик палатаси спикерининг биринчи ўринбосари Акмал Саидов белгиланган.
Йиғилишда ташкилотга аъзо мамлакатлар бозорларида тўлиқ иштирок этишнинг ҳуқуқий асосларини ўрганиш, миллий техник тартибга солиш меъёрларини ташкилот талабларига мослаштириш бўйича ишларни жадаллаштириш зарурлиги таъкидланган. Шунингдек, ташкилот билан ҳамкорликни ташкил этиш бўйича 2021 йилга мўлжалланган «Йўл харитаси» муҳокама қилиниб, тасдиқланган.
Бундан ташқари, йиғилишда соғлиқни сақлаш, қишлоқ хўжалиги ва агросаноат, меҳнат миграциясига оид йўналишларни ҳам ўрганиш кераклиги айтилган.
Аввалроқ ЕОИИ техник регламент талабларини қабул қилиш, ЕОИИ мамлакатларида қабул қилинган 26 та техник регламентлар асосида махсус техник регламентларни ишлаб чиқиш ва тасдиқлаш режалаштирилаётгани тўғрисида хабар берилганди. Россия бош вазири ўринбосари Алексей Оверчук Гайдар форумида Россия 2020 йили Евросиё иқтисодий иттифоқида кузатувчи мақомини олган Ўзбекистон яқин истиқболда иттифоқнинг тўлақонли аъзоси бўлишига умид боғлаганини маълум қилган.
Эслатиб ўтамиз, 2020 йил 11 декабрь куни бўлиб ўтган Евросиё иқтисодий иттифоқининг (ЕОИИ) видеоанжуман шаклидаги саммитида Ўзбекистон ва Кубага ташкилот ҳузуридаги кузатувчи давлат мақомини бериш тўғрисида қарор қабул қилинганди.
Изоҳ (0)