Нега суд қарори ўзгариб қолди? Судья бунга изоҳ беришдан бош тортди

Бош шифокор ва «Дарё» журналисти ўртасида бўлиб ўтган ҳолатни кўриб чиққан Тошкент шаҳар маъмурий суди судьясининг қарори суд залида бошқача, қоғозга кўчирилганида эса бошқача акс этгани маълум бўлди.

Эслатиб ўтамиз, 2020 йилнинг март ойида Республика тери-таносил касалликлари шифохонаси бош шифокори Ойбек Иброҳимов «Дарё» мухбири Мусулмонбек Иброҳимовни ҳақоратлаб, маълумот олишда тўсқинлик қилгани боис мухбир ИИБга ариза билан мурожаат қилган эди. Лекин журналистнинг идорама-идора саргардонлигига қарамай, Миробод тумани маъмурий суди кўриб чиқиш вақти ўтган деб, ишни ёпиб юборганди.

Шундан сўнг «Дарё» мухбири Тошкент шаҳар прокуратурасига ушбу ишни қонуний ўрганиб чиқишни сўраб ариза билан мурожаат қилди. Тошкент шаҳар Миробод тумани прокуратураси аризани ўрганиб чиқиб, кассация протестида Миробод тумани маъмурий судининг 2020 йил 24 июнь кунидаги бош шифокор Ойбек Иброҳимовга нисбатан чиқарилган қарорини ноқонуний ва асоссиз деб топиб, ушбу қарорни бекор қилишни ва ишни қўшимча суриштирувга юборишни сўраб протест киритган.

Суд залида бошқа, қоғозда бошқа қарор

Тошкент шаҳар маъмурий суди судьяси Ғолибжон Давлатов раислигида бўлиб ўтган 2020 йил 10 декабрь кунидаги кассация инстанцияси судида Миробод тумани маъмурий суди чиқарган қарори қайта кўриб чиқилди. Суд аввалги қарорни адолатсиз ва асоссиз деб топиб, Миробод тумани маъмурий судининг 2020 йил 24 июндаги Ойбек Иброҳимовга нисбатан чиқарган қарорини бекор қилди.

Суд залида қарор ўқилаётган вақтда судья Ғолибжон Давлатов «Ҳуқуқбузар Ибрагимов Ойбек Жўраевичга нисбатан Маъмурий жавобгарлик тўғрисидаги кодекснинг 41-моддаси ва 183-моддасида назарда тутилган ҳуқуқбузарлик ҳолатларига ҳуқуқий баҳо бериш учун қўшимча суриштирув ҳаракатларини ўтказиш учун Тошкент шаҳар Миробод тумани Ички ишлар органлари фаолиятини мувофиқлаштириш бошқармасига иш материаллари юборилсин», деб айтган эди.

Лекин суд қарорининг қоғоз вариантида эса «Маъмурий жавобгарлик тўғрисидаги 41-моддасида назарда тутилган ҳуқуқбузарликни содир этганликда айбланган Ойбек Иброҳимовга нисбатан тўпланган маъмурий иш ҳужжати қўшимча суриштирув ҳаракатларини олиб боришлик учун туман маъмурий суди орқали Тошкент шаҳар Миробод тумани ИИО ФМБ суриштирув бўлимига юборилсин», деб ёзилган. Яъни Маъмурий жавобгарлик тўғрисидаги кодекснинг 183-моддасида назарда тутилган ҳуқуқбузарлик ҳолатига баҳо бериш қисми тушириб қолдирилган (суднинг аудиоёзуви таҳририятда мавжуд).

Суд қарорига нима сабабдан ўзгартириш киритилганига изоҳ олиш учун судья Ғолибжон Давлатов билан «Дарё» мухбири боғланди. Судья ҳозир бошқа ишга ўтгани боис ушбу қарорга изоҳ беролмаслигини, агар қарордан норозилик бўлса, юқори турувчи органга шикоят қилиш мумкинлигини қўшимча қилиб ўтди.

Ишни кўриб чиқишни асоссиз рад этган судьяга жазо қўлланиладими?

Тошкент шаҳар маъмурий суди Миробод тумани суди чиқарган қарорини асоссиз деб топиб, бекор қилди.

Кассация инстанциясининг қарорида Миробод тумани маъмурий суди мазкур ишни 15 кунлик муддатда кўриб чиқиш муддатини бузиб, ишни орадан 40 кун кейин кўрилишига йўл қўйган, расмийлаштирилган маъмурий ҳуқуқбузарлик тўғрисидаги маъмурий ишни нотўғри тузилган деб, баённомани тузган органга асоссиз қайтаргани аниқлангани баён этилган.

Ҳақли савол туғилади: биринчи инстанцияда Миробод тумани маъмурий суди судьяси Толипов нима учун баённомани асоссиз қайтарган? Тошкент шаҳар маъмурий суди судьяси ва Миробод тумани маъмурий суди судьясининг хатти-ҳаракатларига Олий суд, Судьялар олий кенгаши ва Бош прокуратура қонунда белгиланган тартибда баҳо бериши мақсадга мувофиқдир.