Sirdaryo viloyatining Shirin shahrida 24-yanvar kuni 1500 MVt quvvatli issiqlik elektr stansiyasi qurilishini boshlash marosimi bo‘lib o‘tdi. Bu haqda viloyat hokimligi matbuot xizmati xabar berdi.
Viloyatda Saudiya Arabistonining ACWA Power kompaniyasi tomonidan yangi IES qurilishi haqida 2020-yilning fevral oyida ma’lum bo‘lgan, noyabr oyida qurilish maydonchasida obyektni qurish uchun yer maydonini tayyorlash ishlari boshlangandi.
Yangi issiqlik elektr stansiyasi Sirdaryo IES yaqinida barpo etiladi va zamonaviy bug‘-gaz qurilmalari bilan (BGQ) jihozlanishi tufayli uning samaradorligi amaldagidan 1,7 barobar yuqori bo‘ladi.
Umumiy qiymati 1,2 milliard dollar bo‘lgan loyihaga ko‘ra, yangi IESda umumiy quvvati 1500 MVtga teng bo‘ladi. Sirdaryo IES energobloklaridan deyarli ikki barobar samarali bo‘lgan H/J toifasiga mansub ikkita bug‘-gaz qurilmasi o‘rnatiladi.
“Bu – boshqa elektr stansiyalari bilan taqqoslaganda, hozirgi vaqtda elektr energiyasi ishlab chiqarish uchun iste’mol qilinayotgan tabiiy gaz miqdorini deyarli ikki barobar iqtisod qilish imkonini beradi”, — deyiladi viloyat hokimligi xabarida.
Ma’lumot uchun, ACWA Power — elektr energiyasi va chuchuk suv ishlab chiqarish bo‘yicha uskunalarni ishlab chiqish, moliyalashtirish va ekspluatatsiya qilishga ixtisoslashgan kompaniya. U 2004-yilda Ar-Riyodda ta’sis etilgan. Yaqin Sharq, Afrika, Markaziy va Janubi-Sharqiy Osiyoning 12 ta mamlakatida hamkorlik loyihalarini amalga oshiradi.
- Masdar kompaniyasi Navoiyda quyosh fotoelektr stansiyasi qurishni boshladi
- O‘zbekistonning yana uch viloyatida quyosh elektrostansiyalarini qurish rejalashtirilmoqda
- Navoiy IES uchinchi bug‘-gaz qurilmasini qurish uchun Yaponiyadan 1 mlrd dollardan ortiq qarz olinadi
- O‘zbekiston 2030-yilga qadar qayta tiklanadigan energiya manbalari ulushini 25 foizgacha oshirishi mumkin
Izoh (0)