Сирдарё вилоятининг Ширин шаҳрида 24 январь куни 1500 МВт қувватли иссиқлик электр станцияси қурилишини бошлаш маросими бўлиб ўтди. Бу ҳақда вилоят ҳокимлиги матбуот хизмати хабар берди.
Вилоятда Саудия Арабистонининг ACWA Power компанияси томонидан янги ИЭС қурилиши ҳақида 2020 йилнинг февраль ойида маълум бўлган, ноябрь ойида қурилиш майдончасида объектни қуриш учун ер майдонини тайёрлаш ишлари бошланганди.
Янги иссиқлик электр станцияси Сирдарё ИЭС яқинида барпо этилади ва замонавий буғ-газ қурилмалари билан (БГҚ) жиҳозланиши туфайли унинг самарадорлиги амалдагидан 1,7 баробар юқори бўлади.
Умумий қиймати 1,2 миллиард доллар бўлган лойиҳага кўра, янги ИЭСда умумий қуввати 1500 МВтга тенг бўлади. Сирдарё ИЭС энергоблокларидан деярли икки баробар самарали бўлган Ҳ/Ж тоифасига мансуб иккита буғ-газ қурилмаси ўрнатилади.
«Бу – бошқа электр станциялари билан таққослаганда, ҳозирги вақтда электр энергияси ишлаб чиқариш учун истеъмол қилинаётган табиий газ миқдорини деярли икки баробар иқтисод қилиш имконини беради», — дейилади вилоят ҳокимлиги хабарида.
Маълумот учун, ACWA Power — электр энергияси ва чучук сув ишлаб чиқариш бўйича ускуналарни ишлаб чиқиш, молиялаштириш ва эксплуатация қилишга ихтисослашган компания. У 2004 йилда Ар-Риёдда таъсис этилган. Яқин Шарқ, Африка, Марказий ва Жануби-Шарқий Осиёнинг 12 та мамлакатида ҳамкорлик лойиҳаларини амалга оширади.
- Masdar компанияси Навоийда қуёш фотоэлектр станцияси қуришни бошлади
- Ўзбекистоннинг яна уч вилоятида қуёш электростанцияларини қуриш режалаштирилмоқда
- Навоий ИЭС учинчи буғ-газ қурилмасини қуриш учун Япониядан 1 млрд доллардан ортиқ қарз олинади
- Ўзбекистон 2030 йилга қадар қайта тикланадиган энергия манбалари улушини 25 фоизгача ошириши мумкин
Изоҳ (0)