O‘zbekistondagi noqulay ob-havo sharoiti sabab ba’zi hududlarda elektr ta’minotida uzilishlar kuzatilayotgan edi. “Hududiy elektr tarmoqlari” korxonasi matbuot xizmati ma’lum qilishicha, elektr ta’minotidagi kamchiliklar bartaraf etilgan.
Dastlabki ma’lumotlarga ko‘ra, ob-havo sharoiti tufayli 110 kilovatt kuchlanishli 10 dan ortiq havo uzatish liniyalari va 35 kilovatt kuchlanishli 4 ta elektr uzatish liniyalarida, shuningdek, 6-10 kilovatt kuchlanishli 210 dan ortiq liniyalarda uzilishlar yuz berdi. Elektr ta’minotidagi uzilishlar 550 mingdan ortiq iste’molchiga ta’sir ko‘rsatdi.
Tarmoqlarda sodir bo‘ladigan avariyaviy o‘chishlarni tezkor bartaraf etish maqsadida “Hududiy elektr tarmoqlari” tomonidan hududlarda jami 481 ta tezkor avariyaviy chiqish brigadalari hamda ularga 378 ta maxsus avariyaviy chiqish mashinalari va maxsus texnikalar safarbar etilgan.
“O‘zgidromet”ning “Gazeta.uz”ga xabar berishicha, 22-yanvar kuni O‘zbekiston hududining katta qismida tezligi 17-22 metr/sekundgacha bo‘lgan kuchli shamol kuzatilgan. Jizzax, Surxondaryo viloyatlari va Farg‘ona vodiysi hududlarida shamolning tezligi 25-30 metr/sekundga yetgan. Markazning qayd etishicha, bunday kuchli shamol ko‘pincha elektr simlarining uzilishiga olib keladi.
Ma'lumot uchun, O‘zbekistonning barcha viloyatlarida 22-yanvar kuni qor bo‘roni kuzatildi. Qor va kuchli shamol Buxoro, Andijon va Xorazm viloyatlarining bir qator tumanlarini chiroqsiz qoldirgan.
Izoh (0)