Toshkent shahri Yunusobod tumanida joylashgan Oloy bozoridagi zargarlik do‘konidan 50 million so‘mlik buyumlarni o‘g‘irlab ketgan shaxslar qo‘lga olindi, deya xabar qilmoqda Tergov departamenti.
Qayd etilishicha, 2021-yilning 17-yanvar kuni soat 19:00 dan 18-yanvar kuni soat 08:00 ga qadar bo‘lgan vaqt oralig‘ida noma’lum shaxslar o‘zgalar mol-mulkini yashirin ravishda talon-toroj qilish maqsadida Yunusobod tumani, Amir Temur ko‘chasi, 40-uyda joylashgan zargarlik do‘koni kirish eshigi oynasini sindirib, do‘kon ichiga g‘ayriqonuniy ravishda kirgan.
Ushbu do‘kon rahbari 27 yoshli Saidolim Sh.ga tegishli, qiymati jami 50 000 000 so‘mlik turli zargarlik hamda kumush va sariq metalldan ishlangan buyumlarni olib, hodisa joyidan yashiringan.
Mazkur holat yuzasidan Yunusobod tumani IIO FMB TB tomonidan Jinoyat kodeksining 169-moddasi 2-qismi “b, v, g” bandlari (o‘g‘rilik) bilan jinoyat ishi qo‘zg‘atilgan.
Holat yuzasidan olib borilgan tezkor surishtiruv ishlari davomida hamda hodisa joyida o‘rnatilgan kuzatuv kameralarining tahlili olib borilganda yuqorida ko‘rsatilgan jinoyatni surxondaryolik 21 yoshli Nozimbek Sh. va 25 yoshli Asliddin N.lar sodir etganligi aniqlangan.
Jinoyat ishi doirasida 21 yoshli Nozimbek Sh. va 25 yoshli Asliddin N.dan turli zargarlik hamda kumush va sariq metalldan ishlangan buyumlar ashyoviy dalil tariqasida rasmiylashtirib olingan.
Hozirda fuqaro Nozimbek Sh. va Asliddin N. gumon qilinuvchi tariqasida jinoyat ishida ishtirok etishga jalb qilinib, protsessual tartibda ushlangan.
Jinoyat ishi yuzasidan tergov harakatlari davom ettirilmoqda.
Avvalroq Navoiyda o‘g‘rilik uchun 5 yil qamalib chiqqan shaxs 2 oy o‘tmay IIB xodimi Lacetti’sini olib qochmoqchi bo‘lgani, Bekobodda 7,5 mln so‘mlik poliz ekinlarini o‘g‘irlagan shaxslar ushlangani hamda Buxoroda tilla taqinchoq o‘g‘rilari qum-tuproqda qoldirilgan oyoq izlari orqali topilgani haqida xabar berilgandi.
Izoh (0)