Bo‘stonliqqa olib boruvchi yo‘lning ma’lum qismida bir tomonlama harakat tashkil etildi

Toshkent viloyati Bo‘stonliq tumanining tog‘li hududlaridagi dam olish maskaniga olib boruvchi yo‘lning ma’lum qismida avtotransport vositalari uchun harakat vaqtincha bir tomonlama tashkil etildi. Bu haqda IIV YHXBB axborot xizmati xabar berdi.

Ma’lum qilinishicha, tog‘li hududlarda qor yog‘ganligi munosabati bilan ko‘plab fuqarolar ayni dam olish kunlarida Bo‘stonliq tumanidagi tog‘li hududlarida joylashgan dam olish maskanlariga uzluksiz ravishda tashrif buyurmoqda.

Tumandagi avtomobil yo‘llarining o‘tkazuvchanlik qobiliyatini inobatga olib, turli ko‘ngilsizliklarning oldini olish maqsadida 4R-12 Bektemir—Chorbog‘ avtomobil yo‘lining 61-kilometridan 4R-6 Toshkent—Chirchiq—Chimyon avtomobil yo‘lining 57-kilometriga o‘tish qismidan, ya’ni Bo‘stonliq tumanining G‘azalkent shahridan chiqish joyidan to 4R-6 avtomobil yo‘lining 87-kilometriga — Bo‘stonliq tumani Yusufxona aholi yashash joyiga qadar avtomobillar harakatlanishi vaqtincha bir tomonlama tashkil etilgan.

“Ushbu holatda barcha haydovchilardan vaziyatni to‘g‘ri tushunib, o‘rnatilgan yo‘l belgilariga rioya qilishni, xizmatga jalb qilingan YPX inspektorlarining ishora va ko‘rsatmalariga amal qilib harakatlanishni so‘rab qolamiz”, — deyiladi xabarda.

Eslatib o‘tamiz, Yangi yil arafasida ham Chimyonda dam oluvchilar sonining keskin ortib ketgani sabab tog‘ga ko‘tarilish yo‘lida mashinalar harakati vaqtincha cheklangan edi.